سەرۆككۆمار: یەكێتی رۆڵی لەڕوبەڕوبوونەوەی دیكتاتۆری و بونیادنانی دەوڵەتی دامەزراوەیی هەبووە

PUKMEDIA

نزار ئامێدی سەرۆك كۆماری عیراق

بە بۆنەی ساڵیادی دامەزراندنی یەكێتیی نیشتیمانیی كوردستانەوە، نزار ئامێدی، سەرۆك كۆماری عیراق، پەیامێكی بڵاوكردەوەو رایگەیاند: ناوی یەكێتی گرێدراوە بە قۆناغە هەستیارەكانی مێژووی هاوچەرخی عیراق و ڕۆڵێكی بەرچاویشی هەبووە لە ڕووبەڕووبوونەوەی دیكتاتۆری و ستەمكاری، و خەبات لەپێناو بونیادنانی دەوڵەتی دامەزراوەیی و یاسا.

دەقی پەیامەكە:

بەبۆنەی پەنجا و یەكەمین ساڵیادی دامەزراندنی یەكێتیی نیشتمانیی كوردستان، گەرمترین پیرۆزبایی ئاراستەی سەرۆكی یەكێتیی نیشتمانیی كوردستان، بەڕێز بافڵ جەلال تاڵەبانی و سەركردایەتی و ئەندام و لایەنگرانی یەكێتی نیشتمانی دەكەم؛ بە پێزانین و ڕێزەوە كاروانی پڕ لە خەباتی حزبەكە لە سەرەتای دامەزراندنییەوە بە ڕابەرایەتی سەركردەی نەتەوەیی گەورەی كۆچكردوو، سەرۆك جەلال تاڵەبانی بەبیر دەهێنینەوە.

یەكێتیی نیشتمانیی كوردستان لە ماوەی زیاتر لە پێنج دەیەدا، هێزێكی سیاسی نیشتمانیی پێشەنگ بووە و بە شێوەیەكی كارا بەشدار بووە لە بەرگریكردن لە مافەكانی گەل و چەسپاندنی بەهاكانی ئازادی و دیموكراسی و دادپەروەری. 

هەروەها ناوی یەكێتی گرێدراوە بە قۆناغە هەستیارەكانی مێژووی هاوچەرخی عیراق و ڕۆڵێكی بەرچاویشی هەبووە لە ڕووبەڕووبوونەوەی دیكتاتۆری و ستەمكاری، و خەبات لەپێناو بونیادنانی دەوڵەتی دامەزراوەیی و یاسا.

لەو یادەدا ڕۆڵی مێژوویی سەرۆكی كۆچكردوو مام جەلال تاڵەبانی بەرز دەنرخێنین، كە ژیانی خۆی بۆ خزمەتكردنی دۆزی گەل و نیشتمانەكەی تەرخان كرد، و بە حیكمەت و دیدگای سیاسی خۆی بەشدار بوو لە چەسپاندنی بناغەكانی عیراقێكی دیموكراسی فیدراڵی فرەیی، و برەودان بە كولتووری دیالۆگ و تەبایی نیشتمانی لەنێوان پێكهاتە جیاوازەكانی عیراقدا.

لە كاتێكدا لەگەڵ كۆمەڵانی خەڵكی كوردستان و عیراقدا بەشداری ئەم یادە ئازیزە دەكەین، متمانەی خۆمان بە بەردەوامی ڕۆڵی نیشتمانیی یەكێتیی نیشتمانیی كوردستان دەردەبڕین لە پشتگیریكردنی ڕێڕەوی دیموكراسی و بەهێزكردنی شەراكەتی نیشتمانی، بەو جۆرەی كە خزمەت بە خواستەكانی هەموو عیراقییەكان بكات بەرەو ئایندەیەكی ئارامتر و سەقامگیرتر و گەشاوەتر.

ڕێز و نەوازش بۆ شەهیدانی یەكێتیی نیشتمانیی كوردستان و بنەماڵە
سەربەرزەكانیان، ئەوانەی گیانی خۆیان بەخت كرد لەپێناو ئەو بنەما نیشتمانی و مرۆییانەی بڕوایان پێی هەبوو ، بە قوربانییە مەزنەكانیان بەشدارییان كرد لە كاروانی خەبات بۆ بەدیهێنانی ئازادی، دیموكراسی و مافەكانی گەلەكەیان.

نزار ئامێدی 
سەرۆك كۆمار
31 ئایار 2026

PUKMEDIA