عیراق بڕی بەرهەمهێنانی بەنزین زیاد دەکات

واع

بەنزین

وەزارەتی نەوتی عیراق، بڕی بەرهەمهێنانی بەنزین بۆ 40 ملیۆن لیتری رۆژانە بەرز دەکاتەوە و هۆکارەکەشی بۆ زۆری خواستی هاووڵاتیان دەگێڕێتەوە.

حسێن تاڵیب، بەڕێوەبەری گشتیی کۆمپانیای دابەشکردنی بەرهەمە نەوتییەکان لە وەزارەتی نەوت، ڕایگەیاند: لەسەر راسپاردەی جێگری سەرۆکوەزیران بۆ کاروباری وزە و وەزیری نەوت، کۆمپانیاکەمان ڕێکاری پێشوەختەی گرتووەتەبەر بۆ دابینکردنی کۆگای ستراتیژیی غاز و بەرهەمە نەوتییەکان، ئەمەش وەک ئامادەکارییەک بۆ ئەو وەرز و بۆنانەی کە تێیاندا خواست لەسەر سووتەمەنی زیاد دەکات.

ڕوونیشیکردەوە: کە هەردوو جۆری بەنزینی (موحەسەن و نۆرماڵ) کە لە بازاڕەکانی ناوخۆدا بەکاردێن و  بەرهەمی پاڵاوگە ناوخۆییەکانن، لە ئێستادا  بەشی پێداویستییەکانی بازاڕی ناوخۆ دەکەن

لە بارەی خواستی هاووڵاتیان بۆ رۆژانی جەژنی قوربان، حسێن تاڵیب ئاماژەی بەوەکرد : لە ڕۆژانی جەژنی قورباندا، بەهۆی گەشت و هاتوچۆی هاووڵاتیان ، خواستێکی زۆر لەسەر سووتەمەنی دروستبوو، بەڵام کۆمپانیاکەمان توانیویەتی بڕی پێویست و زیادە بخاتە بازاڕەوە بۆ ئەوەی هیچ کەموکورتییەک دروست نەبێت.

لە کۆتاییشدا ڕایگەیاند: کۆمپانیای دابەشکردنی بەرهەمە نەوتییەکان ڕۆژانە نزیکەی 33 ملیۆن لیتر بەنزین بۆ بەکاربردنی ناوخۆیی دابین دەکات، بەڵام لە دوو ڕۆژی ڕابردوودا ئەم ڕێژەیە بۆ 40 ملیۆن لیتر لە ڕۆژێکدا بەرزکرایەوە، بە ئامانجی پڕکردنەوەی  خواستی هاووڵاتیان.

PUKMEDIA