سەرۆکوەزیرانی عیراق: گروپە چەکدارەکانی دیکەش لەژێر چەتری دەوڵەتدا کاربکەن

واع

عەلی زەیدی سەرۆکوەزیرانی عیراق

عەلی زەیدی سەرۆکوەزیرانی عیراق، پێشوازی لە بڕیارەکەی موقتەدا سەدر دەکات بۆ هەڵوەشاندنەوەی گروپە چەکدارەکان و داواش لە گروپەچەکدارەکانی دیکە دەکات هاوشێوەی هێزەکانی سەرایا سەلام بەرپرسیارانە و لەژێر چەتری دەوڵەت و دامەزراوە رەسمییەکاندا کار بکەن.

لە راگەیەندراوێکدا، سەرۆک وەزیرانی عیراق و فەرماندەی گشتی هێزە چەکدارەکان، دووپاتی دەکاتەوە: ئەم دەستپێشخەرییە هەنگاوێکی گرنگە بەرەو بەهێزکردنی سەقامگیریی ناوخۆیی، چەسپاندنی شکۆی دەوڵەت و سەروەریی یاسا، هاوکات پاڵپشتییەکی جیدییە بۆ جێبەجێکردنی بنەمای قۆرخکردنی چەک لە دەستی دەوڵەتدا و یارمەتیدەرە بۆ دەزگا ئەمنییەکان تا ئەرکە نیشتمانی و دەستوورییەکانی خۆیان بەجێبهێنن.

سەرۆکوەزیرانی عیراق، داواش دەکات: سەرجەم گروپەچەکدارەکانی دیکە هاوشێوەی هێزەکانی سەرایا سەلام بەرپرسیارانە و لەژێر چەتری دەوڵەت و دامەزراوە رەسمییەکاندا کار بکەن، ئەمەش وەک تاکە گرەنتی بۆ پاراستنی عیراق، پاراستنی سەروەرییەکەی و بەهێزکردنی ئاسایش لەسەر ئەو بنەمایەی کە تەنیا دەوڵەت لایەنی رێگەپێدراوە بۆ چەسپاندنی یاسا و بەکارهێنانی هێز.

عەلی زەیدی سەرۆکوەزیرانی عیراق، لە کۆتایشدا، ئاماژەی بەوەکردووە: قۆناغی ئێستای وڵات پێویستی بە یەکخستنی هەموو هەوڵەکان و پێشخستنی بەرژەوەندیی باڵای نیشتمانی هەیە، بۆ پاراستنی یەکڕیزیی عیراق و بەرزکردنەوەی متمانەی هاووڵاتیان بە دامەزراوە دەستوورییەکان.

PUKMEDIA