سەرۆككۆمار: توركمان پێكهاتەیەكی رەسەنی عیراقەو رۆڵی لەچەسپاندنی پێكەوەژیاندا هەیە

راگەیاندنی سەرۆك كۆماری عیراق

پێشوازی سەرۆك كۆمار لەوەفدی فراكسیۆنی پەرلەمانی توركمان

نزار ئامێدی، سەرۆك كۆماری عیراق، ئەمڕۆ یەكشەممە 24ی ئایاری 2026 لە كۆشكی سەلام لەبەغداد، پێشوازییكرد لە وەفدێكی فراكسیۆنی پەرلەمانی توركمان، بەسەرۆكایەتی ئەرشەد ساڵحی، كە پیرۆزبایی خۆیان پێشكەش بە بەڕێزیان كرد بە بۆنەی هەڵبژاردنی بەسەرۆك كۆمار.

لە دیدارەكەدا بارودۆخی سیاسی وڵات تاوتوێ كراو سەرۆك كۆمار جەختی لەگرنگی پاڵپشتیكردنی هەوڵەكان بۆ تەواوكردنی پێكهێنانی كابینەی حكومەت و گرنگی هەماهەنگی نێوان هێزە نیشتمانییەكان بۆ پاڵپشتی دەسەڵاتی یاسادانان كردەوە،  تا بتوانێت رۆڵی چاودێری و یاسادانانی خۆی بگێڕێت بەشێوەیەك كەخزمەت بە بەرژەوەندی هاووڵاتیان بكات، هاوكات دووپاتی كردەوە كەتوركمان بەشێكی ڕەسەنن لەموزائیكی نیشتمانی و ڕۆڵێكی گرنگیان هەیە لەچەسپاندنی یەكێتی نیشتمانی و پتەوكردنی پێكەوەژیان لەنێوان گەلی عیراق.

لەلای خۆیانەوە ئەندامانی وەفدەكە پاڵپشتی خۆیان بۆ هەوڵەكانی سەرۆك كۆمار دەربڕی بۆ چەسپاندنی سەقامگیری سیاسی و پتەوكردنی هاوكاری نێوان هێزە سیاسیەكانی نیشتیمان، كە هاوكار  دەبێت لە پێشخستنی كاری پەرلەمانی و خزمەتكردنی گەلی عیراق.

PUKMEDIA