سێیەم بەشەخۆراکی ئەمساڵ بە تەواوەتی دابەشدەکرێت

PUKMEDIA

بەشەخۆراکی مانگانە

بەڕێوەبەری گشتیی بازرگانی هەرێم رایگەیاند: سێیەم بەشەخۆراکی ئەمساڵ دابەشدەکرێت و کێشەی کەمی برنج و رۆن کە پێشتر هەبووە چارەسەرکراوە.

نەوزاد شێخ کامیل بەڕێوەبەری گشتیی بازرگانی لە وەزارەتی بازرگانی و پیشەسازی رایگەیاند: لەمڕۆوە لە کۆگاکانەوە خۆراک بۆ ئەو بریکارانە دەچێت کە پارەیان تەسلیم کردووە و ڕاستەوخۆ دەست بە دابەشکردنی سێیەم بەشەخۆراکی ئەمساڵ بەسەر هاووڵاتیاندا دەکرێت.

کێشەی کەمیی برنج لە سلێمانی چارەسەر کرا

هاوکات، کامەران فەتاح بەڕێوەبەری بازرگانی و کەلوپەلی خۆراک لە سلێمانی رایگەیاند: فەرمانی دابەشکردنی سێیەم بەشەخۆراکی ئەمساڵمان پێگەیشتووە و لە نزیکترین کاتدا دابەشی دەکەین و جەختیشی کردەوە کە خواردنی پێویست بەردەستە و پێشتر برنج کەم بوو بەڵام دوێنێ 16 بارهەڵگر برنجیان پێگەیشتووە و هاتنیشی بەردەوام دەبێت.

له دابەشکردنی بەشی یەکەمی خۆراکی ئەمساڵدا کەمتر لە نیوەی هاونیشتمانیان ڕۆنی شلیان وەرگرت و لە بەشی دووەمیشدا هاتنی ڕۆنەکە دواکەوت بەڵام بەڕێوەبەری بازرگانی و کەلوپەلی خۆراک لە سلێمانی دڵنیایی دەدات کە بەرهەمهێنانی ڕۆن دەستیپێکردووەتەوە و ئەو مانگانەی  دابەش نەکراوە لەمەودوا دابەش دەکرێت و بەشی هیچ کەسێک نافەوتێت.

PUKMEDIA