تاوه‌كوو ئێستا نزیكه‌ی هه‌زار حاجی كوردستان گه‌یشتوونه‌ته‌ سعوودیه‌

راگەیاندنى حه‌ج و عومڕه‌ی كوردستان

یەکەم کاروانى حاجیانى هەرێمى کوردستان

پڕۆسەی گواستنەوەی حاجیانی هەرێمی کوردستان بۆ ناو خاکی عەرەبستانی سعوودیە بەردەوامیی هەیە و تا ئێستا نزیکەی هەزار حاجی هەرێمى کوردستان گەیشتوونەتە سعودیە و وتەبێژی حەج و عومرەی هەرێمیش دووپاتی دەکاتەوە کە تاوەکو ناوەڕاستی ئەم مانگە تەواوی کاروانەکان دەگەنە جێی مەبەست و خزمەتگوزاریی تەواویان بۆ دابینکراوە.

ئەمڕۆ شەممە 9ى5ى2026 كاروان ستونی وته‌بێژی رەسمی حه‌ج و عومڕه‌ی كوردستان بە PUKMEDIA ى راگەیاند: تاوه‌كو ئێستا زیاتر له‌ 880 حاجی كوردستان به‌ سه‌لامه‌تی گه‌یشتوونه‌ته‌ خاكی سعوودیه‌.

ئه‌وه‌یشی خسته‌ڕوو:‌ به‌ پێی خشته‌ی دیاریكراو تاوه‌كوو رۆژی 17/5/2026 ته‌واوی حاجیانی كوردستان ده‌گه‌نه‌ سعوودیه‌ و له‌ ئێستادا هه‌موو تیمه‌كانیان به‌ باشترین شێوه‌ به‌ پێشوازییه‌كی زۆر گه‌رم و جیاواز له‌ چاوه‌ڕوانی گه‌یشتنی حاجیاندان.


ئەمەش لە کاتێکدایە، پێنجشەممە 7ـی ئایاری 2026، یەکەم کاروانی حاجیانی کوردستان بەرەو سعودیە بەڕێکەوتن.

به‌گشتی له‌ عیراقدا بۆ وەرزى حەجى ئەمساڵ نزیكه‌ی 40 هه‌زار حاجی سه‌ردانی مه‌ككه‌ ده‌كه‌ن، كه‌ له‌و ژماره‌یه‌، پێنج هه‌زار و 120 حاجیان له ‌هه‌رێمی كوردستانه‌وه‌ گه‌شت ئه‌نجامده‌ده‌ن، هه‌روه‌ها هه‌زار و 262 حاجیان له‌ سنووری پارێزگای سلێمانییه‌، كه‌ 704 حاجیان له‌ ره‌گه‌زی نێرن و 558 حاجیشیان له‌ ره‌گه‌زی مێن.

PUKMEDIA