PUKMEDIA ناوەرۆکی بڕیاری تایبەت بەکێشەی بەبازاڕکردنی گەنم بڵاودەکاتەوە

ئاژانسەکان

گەنمی جوتیاران

پەرلەمانتارێکی یەکێتی لە ئەنجومەنی نوێنەران رایگەیاند: لە بەرژەوەندی جوتیاران و بە بڕیارێکی پەرلەمانیی چەند ڕاسپاردەیەکمان ئاڕاستەی ئەنجومەنی وەزیران کرد تایبەت بە کێشەی گەنمی جوتیاران و شایستە داراییەکانیان.

دیلان غەفور ئەندامی فراكسیۆنی یەكێتی لەئەنجومەنی نوێنەرانی عیراق، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند:لە دانیشتنی 20-4-2026 لە ئەنجومەنی نوێنەران بە بڕیارێکی پەرلەمانیی چەند ڕاسپاردەیەکمان ئاڕاستەی ئەنجومەنی وەزیران کرد تایبەت بە کێشەی گەنمی جوتیاران و شایستە داراییەکانیان و بەپێی بڕیارەکە حکومەتی عێراقمان پابەند کردووە بە خەرجکردنی شایستە داراییەکانی جووتیاران بۆ بەرهەمی گەنم بۆ وەرزی 2024-2025 هەروەها هەڵوەشاندنەوەی جێبەجێکردنی بڕیاری ئەنجومەنی وەزاری بۆ کاروباری ئابووری سەبارەت بە نرخی گەنم بۆ وەرزی کشتوکاڵیی ئەمساڵ و پەسەندکردنی هەمان نرخی ساڵی ڕابردوو.

ئەوەش دەڵێت: لە بڕیارێکی دیکەدا هاتووە کە خەمڵاندنی بڕی بەرهەم لەڕێگەی پێکهێنانی لیژنەیەک کە بە شێوەیەکی شایستە بێت نەوەک دیاریکردنی بە ٧٥٠ کیلۆگرام بۆ هەر دۆنمێک، هەروەها هەڵوەشاندنەوەی سیستمی "ناونووسینی پێشوەختە" (الحجز المسبق) لەکاتی ڕادەستکردنی بەرهەمەکەدا و کارکردن بە سیستەمی پێشوو.

وتیشی: بەپێی خاڵێکی دیکەی بڕیارە پەرلەمانییەکە، وەرگرتنەوەی ئەو قەرزەی لای جوتیارانە ڕادەگیرێت تا کاتی پەسەندکردنی بودجە و پێدانەوەی تەواوی شایستە داراییەکان بە جوتیاران.