دابەشکردنی مووچەی مانگی ئازار بەردەوامە

PUKMEDIA

دراوی عیراقی

ئەمڕۆ 13ی 4ی 2026 دابەشكردنی مووچەی مانگی ئازار بۆ دووەم رۆژ بەردەوامە و بەپێی خشتەكەی وەزارەتی دارایی و ئابوری حكومەتی هەرێمی كوردستان، ئەمڕۆ چەند دەستە و وەزارەتێک مووچە وەردەگرن و سبەینێ سێ شەممە (14 ی 4ى 2026) كۆتایی بەدابەشكردنی مووچە دێت.

بەپێی خشتەكەی وەزارەتی دارایی هەرێم، ئەمڕۆ هەریەک لە ( خاوەن پێداویستی تایبەت، مافی مرۆڤ، دەستەی دەستپاکی، دەستەی وەبەرهێنان، دەستەی ژینگە، دەزگای مین، ناوچەکانی دەرەوەی هەرێم، کۆمسیۆنی باڵای هەڵبژاردن، دیوانی چاودێری دارایی، کاروباری شەهیدان و ئەنفالکراوان، ئاوەدانکردنەوە و نیشتەجێکردن، دارایی و ئابووری، ناوخۆ، داد،ئەنجومەنی دادوەری، پلان دانان، بازرگانی و پیشەسازی، سامانە سروشتییەکان، گواستنەوە و گەیاندن، کشتوکاڵ و سەرچاوەکانی ئاو، شارەوانی و گەشتوگوزار، کار و کاروباری کۆمەڵایەتی، رۆشنبیری و لاوان، کارەبا، ئەوقاف و کاروباری ئاینی، هێزی زێرەڤانی و فەرماندەی بەرگری و فریاکەوتن، سەرۆکایەتی پەرلەمان، سەرۆکایەتی ئەنجومەنی وەزیران، سەرۆکایەتی هەرێم)مووچە وەردەگرن.

ئەمەش لە كاتێكدایە، وەزارەتی دارایی حکومەتی هەرێمی کوردستان لە راگەیەندراوێکدا  رۆژى پێنج شەممە  (9 ی نیسانی 2026) رایگەیاند: بڕی ( 957،122،000،000 ) نۆ سەد و پەنجا و حەوت ملیار و سەد و بیست و دوو ملیۆن دینار وەک شایستەی مووچەی فەرمانبەران و مووچەخۆرانی هەرێمی کوردستان بۆ مانگی ئازار خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عیراق.   

لە راگەیەندراوێکی دیکەشدا ئاماژەی بەوەداوە: هاوشێوەی مانگەکانی رابردوو لەگەڵ گەیشتنی تەمویلی موچەی مانگی ئازار وەزارەتی دارایی حکومەتی فیدراڵ بڕی (21،407،595،375 ) بیست و یەک ملیار و چوار سەد و حەوت ملیۆن و پێنج سەد و نەوەد و پێنج هەزار و 375 دیناری لە تەمویلی مووچەی مانگی ئازار نەناردووە، کە بریتییە لە شایستەی مووچەی مانگەکانی رابردووی خانەنشینانی شارستانی و سەربازی.

PUKMEDIA

خشتەی دابەشکردنی مووچە: