دابەشكردنی مووچەی مانگی ئازار دەستیپێكرد

PUKMEDIA

دراوى عیراقى

وەزارەتی دارایی و ئابوری حكومەتی هەرێمی كوردستان، ئەمڕۆ 12ی 4ی 2026 دابەشكردنی مووچەی مانگی ئازاری دەستپێكرد و بەپێی خشتەكەش، رۆژی سێ شەممە (14 ی 4ى 2026) كۆتایی بەدابەشكردنی مووچە دێت.

هەر بەپێی خشتەكەی وەزارەتی دارایی هەرێم، ئەمڕۆ خانەنشینى شارستانى و پێشمەرگە، زیندانە سیاسییەکان، بەرکەوتوانى کیمیاباران، کەسوکارى شەهیدان و ئەنفال کراوان، خوێندنى باڵاوتوێژینەوەى زانستى، پەروەردە، تەندروستى مووچە وەردەگرن.

ئەمەش لە كاتێكدایە، وەزارەتی دارایی حکومەتی هەرێمی کوردستان لە راگەیەندراوێکدا  رۆژى پێنج شەممە  (9 ی نیسانی 2026) رایگەیاند: بڕی ( 957،122،000،000 ) نۆ سەد و پەنجا و حەوت ملیار و سەد و بیست و دوو ملیۆن دینار وەک شایستەی مووچەی فەرمانبەران و مووچەخۆرانی هەرێمی کوردستان بۆ مانگی ئازار خرایە سەر هەژماری بانکی وەزارەتی دارایی و ئابووری هەرێمی کوردستان لە لقی هەولێری بانکی ناوەندی عیراق.   

لە راگەیەندراوێکی دیکەشدا ئاماژەی بەوەداوە: هاوشێوەی مانگەکانی رابردوو لەگەڵ گەیشتنی تەمویلی موچەی مانگی ئازار وەزارەتی دارایی حکومەتی فیدراڵ بڕی (21،407،595،375 ) بیست و یەک ملیار و چوار سەد و حەوت ملیۆن و پێنج سەد و نەوەد و پێنج هەزار و 375 دیناری لە تەمویلی مووچەی مانگی ئازار نەناردووە، کە بریتییە لە شایستەی مووچەی مانگەکانی رابردووی خانەنشینانی شارستانی و سەربازی.


PUKMEDIA