تەمویلی مووچەی مانگی ئازار بۆ هەرێم نێردرا

PUKMEDIA

دراوی عیراقی

دارایی عیراق تەمویلی مووچەی مانگی ئازاری خستە سەر هەژماری دارایی هەرێم و وابڕیارە رۆژی یەک شەممە دەست بەدابەشكردنی مووچە بکرێت.

وەزارەتی دارایی حکومەتی هەرێمی کوردستان لە راگەیەندراوێکدا رایگەیاند: ئەمڕۆ پێنج شەممە  ( ٩ ی نیسانی ٢٠٢٦) بڕی ( ٩٥٧،١٢٢،٠٠٠،٠٠٠ ) نۆ سەد و پەنجاو حەوت ملیارو سەدو بیست و دوو ملیۆن دینار وەک شایستەی مووچەی فەرمانبەران و مووچەخۆرانی هەرێمی کوردستان بۆ مانگی ئازار خرایە سەر هەژماری بانکی وەزارەتی دارایی و ئابووری هەرێمی کوردستان لەلقی هەولێری بانکی ناوەندی عێراق.      

ئەوەش هاتووە: بەهۆی ئەوەی پارەکە لە کۆتایی دەوامی فەرمی بانکی ناوەندی عێراق داخڵی سەر هەژماری بانکی وەزارەتمان بووە، وەرگرتنی پارە لە لقی هەولێری بانکی ناوەندی عێراق دەکەوێتە ڕۆژی یەک شەممەو ڕاستەوخۆ هەمان ڕۆژ دوای وەرگرتنی پارەکە دەست بەدابەشکردنی مووچە دەکرێت.

لە راگەیەندراوێکی تریشدا ئاماژەی بەوە داوە: هاوشێوەی مانگەکانی ڕابردوو لەگەڵ گەیشتنی تەمویلی موچەی مانگی ئازار وەزارەتی دارایی حکومەتی فیدراڵ بڕی ( ٢١،٤٠٧،٥٩٥،٣٧٥ ) بیست و یەک ملیارو چوار سەدو حەوت ملیۆن و پێنج سەدو نەوەدو پێنج هەزار دیناری لە تەمویلی مووچەی مانگی ئازار نەناردووە کە بریتییە لە شایستەی مووچەی مانگەکانی ڕابردووی خانەنشینانی شارستانی و سەربازی.

PUKMEDIA