ئێران وەڵامی هێرشەکان دەداتەوە

رۆیتەرز

هێرشێکی مووشەکی ئیسرائیل بۆ سەر تاران

ئەمڕۆ 28ی2ی2026، هێرشی هاوبەشی ئیسرائیل و ئەمریکا بۆ سەر ئێران دەستیپێکرد و چەندین ناوچەی ستراتیژی کرانە ئامانج و ئێرانیش وەڵامی هێرشەکانی دایەوە.

سوپای ئیسرائیل لە راگەیەنراوێکی بەپەلەدا ئاشکرایکرد؛ هێزە ئاسمانییەکانیان دەستیان کردووە بە وەشاندنی "هێرشی پێشوەختە" بۆ سەر چەند پێگەیەکی سەربازی و ستراتیژی لە ناوخۆی ئێران.

میدیاکانی ئیسرائیل بڵاویانکردووەتەوە کە دەیان ئامانج لە ناوخۆی ئێران بۆردوومان کراون، هاوکات ئاژانسە هەواڵییەکانی ئێران ئاماژەیان بەوە کردووە کە مووشەک لە شەقامی دانشگا و جمهوری لە ناوەندی تاران کەوتووەتە خوارەوە، هەروەها مەیدانی پاستوور کراوەتە ئامانج و دووکەڵ لە چەندین ناوچەی پایتەخت بەرزبووەتەوە.

 لەگەڵ دەستپێکردنی هێرشەکان، ئیسرائیل باری لەناکاوی راگەیاند ، هاوکات سوپای ئیسرائیل بڕیاریدا بە قەدەغەکردنی تەواوی چالاکییە فێرکارییەکان و کۆبوونەوە گشتییەکان، هەروەها ڕۆشتن بۆ شوێنە گشتییەکان و شوێنی کارکردن قەدەغە کرا، جگە لەو کۆمپانیا و ناوەندانەی کە وەک دامەزراوەی سەرەکی و پێویست پۆلێن کراون.

لەلایەکی دیکەوە، ئێران  وەڵامی هێرشەکانی دایەوە و ئاژانسی تەسنیمی ئێرانی بڵاویکردەوە: ئێران هێرشێکی فراوانی درۆنی و موشەکی لە وەڵامی هێرشەکان دەستپێکردووە، میدیاکانی ئیسرائیلیش پشت راستیان کردەوە کە لە حەیفا دەنگی تەقینەوە دەبیسترێت.

بەهۆی دەستپێکردنەوەی هێرشەکان و وەڵامی ئێران، ئاسمانی ناوچەکە داخرا، هەر زوو ئێران و ئیسرائیل ئاسمانی وڵاتەکەیان تا کاتێکی نادیار داخست، وەزارەتی گواستنەوەی عیراقیش داخستنی ئاسمانی وڵاتەکەی بە رووی هەموو فڕۆکەیەکدا راگەیاند، ئیماراتیش ئاسمانی خۆی داخست.

PUKMEDIA