بەڕێوەبەری خۆراک زیادبوونی نرخی بەشەخۆراک رەتدەکاتەوە

راگەیاندنی بەرێوەبەرایەتی بەشەخۆراک

بەشەخۆراکی مانگانە

دابەشکردنی بەشەخۆراکی هاووڵاتیان بەسەر بریکارەکاندا دەستیپێکردووە و لەماوەیەکی کەمدا دەگاتە سەرجەم بریکارەکان، بەڕێوەبەری خۆراکی سلێمانیش سەرجەم ئەو دەنگۆیانە رەتدەکاتەوە کە باس لەزیادکردنی ئەو بڕە پارەیە دەکەن مانگانە لەبەرامبەر وەرگرتنی بەشەخۆراکدا لەهاووڵاتیان وەردەگیرێت.

کامەران فەتاح بەڕێوەبەری خۆراکی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: دابەشکردنی بەشەخۆراکی هاووڵاتیان بەسەر بریکارەکاندا دەستیپێکردووە و لەماوەیەکی کەمدا دەگاتە سەرجەم بریکارەکان و هاووڵاتیان دەتوانن وەریبگرن.

راشیگەیاند: تا ئیستا هیچ جۆرە نوسراوێکی رەسمیمان پێنەگەیشتووە بۆ زیادکردنی نرخی ئەو پارەیەی مانگانە لەبەرامبەر وەرگرتنی بەشەخۆراکدا لەهاووڵاتیان وەردەگیرێت و هەرکاتێک بڕیارێکت لەوجۆرا هەبێت خۆمان بڵاویدەکەینەوە.

ئەمەش لەکاتێکدایە، پێشتر بەهۆی ئەوەی هەرێم پارەی بەشەخۆراکی هاووڵاتیانی لەساڵی 2003وە تا ساڵی 2022 بۆ بەغداد نەناردبوو، کە بڕەکەی زیاتر لە 117 ملیار دینارە، بەغداد بەشەخۆراکی هەرێمی راگرتبوو، بەڵام کێشەکە چارەسەرکراو دابەشکردنی بەشە خۆراک دەستیپێکردەوە.

هاوکات، بەشەخۆراکی مانگانەی هاووڵاتیان کە خۆی لە (ئارد، برنج، زەیت، نیسک، فاسۆلیا، نۆک، لەتکە نۆک، دۆشاو، شەکر) دەبینێتەوە، مانگانە بەسەر هاووڵاتیاندا دابەشدەکرێت، بەڵام بە تێکڕای ساڵەکە چەند مانگێک دابەشناکرێت و ئەمەش کاریگەری لەسەر جێگیرکردنی نرخی خۆراک لەبازاڕەکاندا هەیە و بەدابەشنەکردنی بەشەخۆراک نرخەکان لەبازاڕدا بەرز دەبنەوە.

PUKMEDIA