تەنها دوو رۆژ ماوە بۆ بەئەلکترۆنیکردنی فۆڕمی خۆراک

PUKMEDIA

فۆڕمی ئەلکترۆنی خۆراک

به‌ڕ‌‌ێوه‌به‌ری پسووڵه‌ی خۆراكی سلێمانی رایدەگەیەنێت: وادەی بەئەلکترۆنیکردنی فۆڕمی خۆراک دریژکراوەتەوە و لەم قۆناغەدا تەنها ئەو کەسانەی خۆیان تۆمارنەکردووە یاخود هەڵەیانکردووە لە پڕکرنەوە یاخود لەدەرەوە بوون دەتوانن خۆیان تۆماربکەن.

ئاراس محه‌مه‌د به‌ڕ‌‌ێوه‌به‌ری پسووڵه‌ی خۆراكی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: وادەی بەئەلکترۆنیکردنی فۆڕمی خۆراک لە 10ی ئەم مانگەوە درێژکراوەتەوە بۆ 20ی مانگ، کە لەم قۆناغەدا تەنها ئەو کەسانەی خۆیان تۆمارنەکردووە یاخود هەڵەیانکردووە لە پڕکرنەوە یاخود لەدەرەوە بوون دەتوانن خۆیان تۆماربکەن.

راشیگەیاند: لەم قۆناغەدا بەشێوەیەکی خۆڕایی گۆڕانکارییەکان دەکرێت، بەڵام قۆناغەکانی داهاتوو هەر گۆڕانکارییەک بەبڕی 6 هەزار دینار ئەنجام دەدرێت.

بەپێی زانیارییەکانی PUKMEDIA،تا ئێستا 87٪ی هاووڵاتیان لەسەرجەم پارێزگاکانی هەرێم فۆڕمی خۆراکەکانیان کردووە بە ئەلکترۆنی کە دەکاتە 4 ملیۆن و 652 هەزار و 283 کەس، لەژمارەیەش ملیۆنێک و 741 هەزار و 907 کەسیان لەپارێزگای هەولێرن کە دەکاتە 88٪ و ملیۆنێک و 704 هەزار و 828 کەسیان لە لەپارێزگای سلێمانین کە دەکاتە 87٪ و ملیۆنێک 102هەزار و 774 کەسیان لە پارێزگای دهۆکن کە دەکاتە 83٪ و 102هەزار و 774 کەسیان لە پارێزگای هەڵەبجەن کە دەکاتە 89٪ کەس.

 لە رۆژی 7ی5ی 2023وە بە مەبەستی گۆڕینی پسوڵەی خۆراک لە کاغەزەوە بۆ ئەلکترۆنی، مامەڵەی پسوڵەی خۆراك راگیراوە و نە منداڵ زیاد دەکرێت و نەبڕینی بەشەخۆراکی مردووش ئەنجام دەدرێت، هاووڵاتیانیش لە چاوەڕوانی دەستپێکردنەوەی پڕۆسەکەن.

ئەمەش لەکاتێکدایە، رۆژی 3ی حوزەیرانى 2025، پڕۆسەی بە ئەلکترۆنیکردنی فۆرمی خۆراکی هاووڵاتیان لە هەرێمی کوردستان دەستیپێکردووە، بڕ‌‌‌یاربوو رۆژی 5ی 7ی 2025 كۆتا واده‌ی پڕ‌‌كردنه‌وه‌ی فۆڕ‌‌‌مە ئه‌لكترۆنییەکە بێت، به‌ڵام واده‌كه‌ی چەندجارێک درێژکرایەوە لە پێناوى ئەوەى دەرفەتى زیاتر بدرێت بە هاووڵاتییان بۆ ئەوەى فۆڕمەکە پڕبکەنەوە.

PUKMEDIA