یەکەم کاروانی حاجییان گەڕانەوە و پێدانی ڤیزا بەعومرەکاران دەستیپێکردەوە

کوردستان 12:01 PM - 2025-06-11

پرۆسەی گەڕانەوەی حاجییان بەڕێگای وشکانیی و ئاسمانیی دەستیپێکرد و دەرگای پێدانی ڤیزا بە عومرەکاران کرایەوە.

بڕیارە 12ی6ی2025، گەڕانەوەی حاجییانی هەرێمی کوردستان بەڕێگەی وشکانیی و 14ی6ی2025 بەڕێگەی ئاسمانیی دەستپێبکات و تاوەکو 20ی ئەم مانگە سەرجەم حاجییان بگەڕێنەوە هەرێمی کوردستان.

نەبەز ئیسماعیل وتەبێژی وەزارەتی ئەوقاف و کاروباری ئایینیی هەرێمی کوردستان رایگەیاند:"گەڕانەوەی حاجییانی هەرێمی کوردستان بە رێگەی وشکانی سەعات 04:00ـی بەیانی رۆژی 12ـی مانگ دەستپێدەکات، کە لە هەزار و 645 حاجی پێکدێن، هەروەها گەشتی فڕۆکە 14ی مانگ دەستپێدەکات، تاوەکو 20ی ئەم مانگە ھەموو حاجیان دەگەنەوە کوردستان".

ئەمەش لەکاتێکدایە، ئەمڕۆ چوارشەممە 11ی حوزەیرانی 2025، یەکەم کاروانی حاجییان لە فڕۆکەخانەی تائیفەوە گەیشتەوە فڕۆکەخانەی نێودەوڵەتیی بەغدا، هاوکات یەکەم کاروانیش بە رێگەی وشکانی لە شاری مەککەوە بەڕێکەوتن

نزیکەی 40 هەزار هاووڵاتی لە هەرێمی کوردستان و پارێزگاکانی دیکەی عیراقەوە بەمەبەستی بەجێهێنانی فەریزەی حەج، لە ڕێگەی ئاسمانی و وشکانییەوە سەردانی سعودییەیان کرد.

پێدانی ڤیزا بەعومرەکاران دەستیپێکردەوە

دوای تەواوكردنی فەریزەی حەج سعودیە دەرگای عومرەی کردەوە و رایگەیاند:"دەرگای داواکاری بۆ وەرگرتنی  ڤیزا بۆ ئەنجامدانی عومرە  کراوەتەوە و لە ئەمڕۆوە بەجێگەیاندنی سونەتی عومرە بۆ عومرەکارانی ناوخۆی وڵات و دەرەوەی وڵات دەستپێدەکاتەوە.


راشیگەیاند:" سەرجەم ئامادەکارییەکان بۆ بەڕێوەچوونی وەرزێکی نوێی عومرە تەواو بووە، ئاسانکاریی تەواو بۆ عومرەکاران لە ناوخۆ و دەرەوەی وڵات دەکرێت.

ئەمەش لەکاتێکدایە، ساڵانە پێش وەرزی حەج سعودیە پێدانی ڤیزای عومرە رادەگرێت و دوای تەواوبوونی رێککارەکان، ئەنجامدانی فەریزەی حەج دەستیپێدەکاتەوە.

PUKMEDIA