زیاتر لە چوار هەزار حاجی هەرێم گەیشتوونەتە مەککەی پیرۆز

کەناڵی گەلی کوردستان

بەڕێکەوتنی حاجییانی هەرێم بۆ مەککەی پیرۆز

بۆ ئەنجامدانی فەریزەی حەجی ئەمساڵ 5 هەزار و 136 هاووڵاتی هەرێمی كوردستان لەرێگەی وشكانی و ئاسمانییەوە سەردانی وڵاتی سعودیە دەكەن، لەو ژمارەیەش  تائێستا  چوار هەزار و 685 هاووڵاتی بۆ بەجێهێنانی فەریزەی حەج بەرەو سعودیە بەڕێكەوتوون.

بەرێوەبەرایەتی حەج و عومرەی هەرێمی كوردستان لەراگەیەندراوێكدا رایگەیاندووە:"حكومەتی هەرێم بە بڕی چوار ملیار و 200 ملیۆن دینار پاڵپشتی پرۆسەی حەجی ئەمساڵ دەكات، تا تێچووی حەج لەسەر هاووڵاتیان كەم بكرێتەوە، باسی لەوەشكرد رۆژانی 16 و 17ی  ئەم مانگە هاووڵاتیانی هەرێمی كوردستان بەڕێگای وشكانی بەرێكەوتوون، كە ژمارەیان هەزار و 645 حاجییە".

راشیگەیاند:"رۆژی 19ی ئەم مانگە یەكەم كاروانی هاووڵاتیانی هەرێم بەڕێگەی ئاسمانی لە هەردوو فرۆكەخانەی نێودەوڵەتی هەولێر و سلێمانییەوە بەرەو سعودیە بەرێكەوتوون، كە ژمارەیان سێ هەزار و 491 حاجییە و پرۆسەكەش تا 28 ی ئەم مانگە بەردەوام دەبێت".

ئەمەش لەکاتێکدایە، لەناوەڕاستی ئەم مانگەوە حاجیانی هەرێمی کوردستان بەچەند کاروانێک و بەڕیگەی ئاسمانی و وشکانی بەرەوە وڵاتی سعودییە بەڕێکەوتوون بۆ بەجێهێنانی فەریزەی حەج، کە ژمارەیان پێنج هەزار و 136 حاجییە و تا 28 ی مانگ سەرجەمیان دەگەنە مەککەی پیرۆز، هاوکات تا ئێستاش 21 هەزار  حاجى عیراقی بۆ بەجێهێنانی فەریزەی حەج گەیشتوونەتە سعودیە.


PUKMEDIA