دۆلار بە 11 هەزار کەمتر لە نرخی بازاڕ بە حاجیان دەدرێت

کوردستان 11:17 AM - 2025-05-07

بڕی 2 هەزار دۆلار بە نرخی رەسمی بەو هاووڵاتیانە دەدرێت کە فەریزەی حەج جێبەجێدەکەن، بەوپێیەش بۆ هەر 100 دۆلارێکی ئەمریکی نرخی 132 هەزار دیناریان لێ وەردەگیرێت، بانکی رەشید رایدەگەیەنێت:"  بانکەکە ژمارەیەک لقی خۆی دیاریکردووە بۆ فرۆشتنی دۆلار بە حاجیان بەو نرخە رەسمییەی کە لەلایەن بانکی ناوەندی عیراقەوە دیاریکراوە".

دۆلار بە نرخی رەسمیی دەدرێت بە حاجییان

ئەمڕۆ چوارشەممە 7-5-2025، بانکی ڕەشید  لە بەیاننامەیەکدا ئاشکرایکرد، کە  ژمارەیەک لقی خۆی دیاریکردووە بۆ فرۆشتنی دۆلار بە حاجیان بە نرخی 132 هەزار بۆ هەر 100 دۆلارێک، ئەمە لەکاتیکدایە کە ئەمڕۆ لە بازاڕەکانی مامەڵەی دراو نرخی 100 دۆلار بە 143.500 دینارە، بەو پێیەش زیاتر لە 11 هەزار دینار کەمتر بۆ هەر 100 دۆلارێک بەو کەسانە دەدرێت کە بەنیازی بەجێگەیاندنی فەرێزەی حەجن و سەردانی شانشینی سعودییە دەکەن.

بەگوێرەی راگەیەندراوەکەی بانکی رەشید:"داواکارییەک لە رێگەی لقە دیاریکراوەکانییەوە پێشکەش دەکرێت و دواتر  گەیاندن و وەرگرتنیش لە هەمان لق دەبێت"، هەروەک فرۆشتنی دۆلار گەشتیاران لەڕێگەی وشکانی و ئاسمانییەوە دەگرێتەوە.

"ئامانج لەم دەستپێشخەرییە پاڵپشتیکردنی حاجیانی عیراقە بەهەرێمی کوردستانیشەوە، کە ئاسانکارییە بۆ دابینکردنی پێداویستییە داراییەکانیان لە وەرزی حەجدا". لە راگەیەندراوی بانکەکەدا هاتووە.

حاجیانی هەرێم لەبڕیارەکەی بانکی رەشید سودمەند دەبن

تەها سەعید بەڕێوەبەری حەج و عومرەی سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" رۆژی هەینی 16-5-2025 یەکەم کاروانی حاجیان لەسلێمانی لەڕێگەی وشکانییەوە بەڕێدەکەون و دواتر کاروانی هەولێر بەهەمان رێگە بەڕێدەکەون، هاوکات رۆژی دووشەممە 19-5-2025 یەکەم کاروان لەڕێگەی ئاسمانییەوە بەڕێدەکەون.

"هاووڵاتیانی هەرێمی کوردستانیش لەو بڕیارەی بانکی رەشید سودمەند دەبن و بانکەکە لقەکانی لەهەرێم راسپاردووە کە بڕی 2 هەزار دۆلار بە نرخی رەسمی کە 132 هەزار دینارە لە حاجیان وەربگرن" بەڕێوەبەری حەج و عومرەی سلێمانی وایوت.

بڕیارە حاجیانی هەرێمی کوردستان لە ناوەڕاستی ئەم مانگەوە بەچەند کاروانێک بەرەوە وڵاتی سعودییە بەڕێبکەون بۆ بەجێهێنانی فەریزەی حەج، کە ژمارەیان پێنج هەزار و 190 حاجییە.

PUKMEDIA