وتەبێژی کۆمسیۆن: لەئامادەکارییەکان بۆ هەڵبژاردنی پەرلەمانی کوردستان بەردەوامین

PUKMEDIA

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق ئامادەکارییەکانی بۆ هەڵبژاردنی خولی شەشەمی پەرلەمانی کوردستان بەردەوامە و لەوچوارچێوەیەشدا بە ئامادەبوونی کەناڵەکانی راگەیاندن لە بەغداوە راستەوخۆ تیروپشک بۆ پێدانی ژمارەی بە حزب و هاوپەیمانێتییەکان و کاندیدە سەربەخۆکان دەکات.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "کۆمسیۆن لە ئامادەکارییەکانی بۆ ئەنجامدانی هەڵبژاردنی پەرلەمانی کوردستان بەردەوامە و لەدوای کۆتاییهاتنی وادەی پێشکەشکردنی ناوی کاندیدەکان، تیروپشک بۆ ژمارەی حزب و هاوپەیمانێتییەکان و کاندیدە سەربەخۆکان دەکات".

"بە ئامادەبوونی کەناڵەکانی راگەیاندن، راستەوخۆ کۆمسیۆن رۆژی 7ی 4ی 2024 لە بەغدای پایتەختی عیراق تیروپشک بۆ پێدانی ژمارە بە حزب و هاوپەیمانی و کاندیدە سەربەخۆکان دەکات، کە لە ژمارە 101ـەوە دەستپێدەکات"، وتەبێژەکەی کۆمسیۆن وادەڵێت.

بەپێێ زانیارییەکانی PUKMEDIA لە پڕۆسەی تیروپشکەکەدا دوو ئامێر بەکاردەهێندرێت، کە ئامێرێکیان تایبەتە بە ناوی حزب و هاوپەیمانێتی و کاندیدە سەربەخۆکان، ئامێری دووهەمیشیان ژمارەکان لەخۆدەگرێت کە لە ژمارە 101ـەوە دەستپێدەکات و لەگەڵ هەڵبژاردنی هەر ناوێکی حزب و هاوپەیمانی و کاندیدی سەربەخۆ، لەبەرامبەردا ژمارەیەک بۆ ئەو حزب و هاوپەیمانێتی و کاندیدە سەربەخۆیانە دەردەهێندرێت.

بۆ هەڵبژاردنی پەرلەمانی کوردستان تێکڕا 20 حزب و 2 هاوپەیمانێتی و 62 کاندیدی سەربەخۆ بۆ بەشداریکردن لە پرۆسەکە تۆمارکراون، کە لەبازنەکانی هەڵبژاردن بەشداردەبن، بەڵام لەگەڵ ئەوەی وادەی ناو تۆمارکردنی لیست و هاوپەیمانێتییەکان کۆتاییهاتووە، تەنها دوو هاوپەیمانێتی و 10 حزب و 54 کاندیدی سەربەخۆ ناویان تۆمار کردووە.
PUKMEDIA