ئەندامێک: رێکنەکەوتنی هەولێر و بەغدا مووچەو بوودجەی دواخستووە

PUKMEDIA

دراوی عیراقی

دواکەوتنی دابەشکردنی مووچەی فەرمانبەران و بوودجەی هەرێمی کوردستان پەیوەندی بە رێکنەکەوتنی هەولێر و بەغداوە هەبووە لەسەر رێکارەکانی یاسای بوودجە، ئەندامێکی لیژنەی دارایی لەئەنجومەنی نوێنەرانی عیراق-یش رایدەگەیەنێت:"حکومەتی عیراق جدییە لە تەواوکردنی رێکارەکانی بودجە".

د.نەرمین مەعروف ئەندامی لیژنەی دارایی لە ئەنجومەنی نوێنەرانی عیراق بەسایتی رەسمی یەکێتیی نیشتمانیی کوردستان PUKMEDIA ی راگەیاند:" پێشتر حکومەتی هەرێم و حکومەتی عیراق لەسەر پرسی بودجە و شایستە داراییەکانی هەرێمی کوردستان رێککەوتوون لەیاسای بوودجەدا جیگیرکراوە، سەردانی وەفدی هەرێمیش بۆ بەغدا تەنها لەپێناو رێککەوتن لەسەر رێکارەکانی یاسای بودجە بووە، نەک رێککەوتنی گشتی هەرێم و بەغدا".

"حکومەتی عیراق هەنگاوی جدی ناوە بۆ تەواوکردنی رێکارەکانی بوودجە، لەناویاندا پرسی بودجە و شایستە داراییەکانی هەرێم، نەناردنی بڕێک پارەش بۆ مووچەی فەرمانبەرانی هەرێم لەلایەن حکومەتی عیراقەوە پەیوەندی بە رێکنەکەوتنی هەرێم و بەغداوە هەبووە لەسەر رێکارەکان"، د.نەرمین مەعروف وایوت.

دوای زیاتر لە دوو مانگ لیژنەی دارایی لە ئەنجومەنی نوێنەرانی عیراق گفتوگۆی وردیان لەسەر بڕگە بە بڕگەی پرۆژە یاسای بوودجە کرد و دواتر گفتوگۆی نوێنەرانی عیراق لەسەر پرۆژەكە لە ٧-٦-٢٠٢٣ەوە دەستیپێكرد و دوای 5 رۆژ دانیشتی پەرلەمان، پرۆژە یاسای بودجە بۆ هەر سێ ساڵی 2023، 2024، 2025 پەسندكرا و عیراق گەورەترین پڕۆژەیاسای بودجەی تێپەڕاند كە لە 134.5 ترلیۆن دینار پێكهاتووە و پشكی هەرێمی كوردستانیش تێیدا 12.67% ە، كە ساڵانە دەگاتە 20 ترلیۆن دینار و مانگانە 1.6 ترلیۆن دینار دەكات.

دوای پەسندکردنی، پرۆژە یاساکە رەوانەی سەرۆكایەتی كۆمارکرا و د.لەتیف رەشید سەرۆككۆمار ئیمزای کرد ئاڕاستەی رۆژنامەی وەقائعی کرد بۆ بڵاوکردنەوە، پاشان رۆژی ٢٦-٦-٢٠٢٣ یاسای بودجەی عیراق بەرەسمی لەرۆژنامەی وەقائعی عیراق بڵاوکرایەوە.

بەپێی یاساکە بودجە لە ١-١-٢٠٢٣ ەوە کاریپێدەکرێت، بەڵام پشکی هەرێم لە یاسای بودجە لە ٢٥ی ئازاری ٢٠٢٣ لە بودجە جێگیرکراوە، کەهاوکاتە لەگەڵ راگرتنی نەوتی هەرێمی کوردستان.

PUKMEDIA