کۆڕەک تیلیکۆم دۆسیەیەکی دیکەی دۆڕاند

PUKMEDIA

لۆگۆی کۆمسیۆنی راگەیاندن و گەیاندنی عیراق

كۆمپانیای كۆڕەك تیلیكۆم كە بەشێكی زۆری پشكەكانی لەلایەن سیروان سابر بارزانییەوە خاوەندارێتی دەكرێت، لە ماوەی دوو مانگدا دوو داوای یاسایی دۆڕاند‌و بەپێی ئەو داوایانەش دەبێت نزیكەی 2 ملیار‌و 500 ملیۆن دۆلار بداتە كۆمپانیایەكی كوەیتی‌و حكومەتی عیراق.

کۆڕەک تیلیکۆم دەبێت 800 ملیۆن دۆلار بداتە گەنجینەی دەوڵەتی عیراق

كۆمیسیۆنی راگەیاندن و پەیوەندییەكانی عیراق، بردنەوەی بڕیارێكی دادوەری لە بەرژەوەندی خۆی راگەیاند، كە كۆمپانیای كۆڕەك تیلیكۆم ناچار دەكات نزیكەی 800 ملیۆن دۆلار بدات بە گەنجینەی دەوڵەت.

عەلی موئەیەد سەرۆكی كۆمیسیۆنی راگەیاندن و پەیوەندییەكانی عیراق لە راگەیەنراوێكدا ئاماژەی بەوەكردووە: "بڕیارێكی دادوەرییان لە بەرژەوەندی كۆمسیۆنەكە بەدەستهێناوە، كە كۆمپانیای كۆڕەك تیلیكۆم پابەند دەكات 800 ملیۆن دۆلار بداتە گەنجینەی دەوڵەتی عیراق".
لە راگەیەندراوەكەدا هاتووە: "بە چاودێریی ورد و چڕی محەمەد شیاع سودانی سەرۆك وەزیرانی عیراق، دەستەكەیان توانی دۆسیەیەكی یاسایی لەگەڵ كۆمپانیای كۆڕەك تیلیكۆم یەكلابكاتەوە و پابەندی بكات بە پێدانی نزیكەی 800 ملیۆن دۆلار لە بەرژەوەندیی دەوڵەتی عیراق، وەك پارەی مۆڵەت و فریكوێنسی بەكارهێنراو لەلایەن كۆمپانیاكە و باجەكانی دیكە كە ساڵانێكە نەیداوە".
سەرۆكی كۆمیسیۆنی راگەیاندن و پەیوەندییەكانی عیراق هۆشداریشیدا: "ئەگەر بڕیارە دادوەرییەكان جێبەجێ نەكرێن یاخود كۆمپانیاكە ئەو پێبژاردنە داراییە نەدات بە گەنجینەی دەوڵەت، ئەوا پەنا دەبەنەبەر رێوشوێنی یاسایی تر".

کۆمپانیای کۆڕەک نزیکەی 2 ملیار و 500 ملیۆن دۆلار سزا دراوە

ئەمەش لەكاتێكدایە كۆمپانیای كۆڕەك تیلیكۆم لەمانگی ئاداری ئەمساڵدا داوایەكی تری لە دادگای ناوبژیوانی نێودەوڵەتی دۆڕاند‌و دادگا بڕیاریدا كە دەبێت بەبڕی یەك ملیار‌و 650 ملیۆن دۆلار قەرەبووی كۆمپانیای ئەجیلیتی كوەیتی بكاتەوە.

پێشتریش كۆمپانیای ئینتەرناشناڵ هۆڵدینگ‌ و (تیلیكۆم عیراق) كە سەر بە كۆمپانیای (ئەجیلیتی كوەیت)ـییە، لە دادگای ناوبژیوانی نێودەوڵەتی، بەتۆمەتی بەرتیلدان‌و فێڵكردن لەبەرپرسانی دەستەی پەیوەندییەكانی عیراق بۆ دەركردنی بڕیاری هەڵەو دەستبەسەراگرتنی پشكی هەردوو كۆمپانیاكە لەبەرژەوەندی كۆڕەك تیلیكۆم، داوایەكی یاسایی لەسەر كۆمپانیای كۆڕەك تیلیكۆم و سیروان بارزانی وەك پشكداری سەرەكی  كۆمپانیاكە تۆماركرد، دواجار لە مانگی ئاداری ئەمساڵدا بڕیاری دادگا بڵاوكرایەوە، كە كۆمپانیای كۆڕەك تیلیكۆمی پابەندكردووە بەبڕی ملیارێك و 650 ملیۆن دۆلار وەكو قەرەبوو بداتەوە بەهەردوو كۆمپانیاكە، بەوپێیەش كۆمپانیای كۆڕەك تیلیكۆم لە دوو دۆسیەی یاساییدا، نزیكەی 2 ملیار‌و 500 ملیۆن دۆلاری بە هاوبەشە كوەیتییەكانی ‌و حكومەتی عیراق دۆڕاندوە.
PUKMEDIA