یەكێتی: ئەركی هەموانە ئێزدییەكان لەهەڕەشەو پەلاماردانی تر بپارێزن

لە یادی كارەساتی   جینۆسایدی  كوردانی  ئێزدی  وپەلاماردانی   شەنگال و دەوروبەری  لە لایەن چەكدارانی تیرۆریستی داعشەوە، سەری  رێز و نەوازش  بۆ قوریانیانی  ئەو كارەساتە دائەنەوێنین . 
 هەر لەم یادە كارەساتبارەدا  وێرای ئەوەی ئەو ناوچانە لە چنگی زوڵم و زۆری  چەكدارانی داعش رزگار كراوەو بەشێك لەو كەسانەی بە دیل و كەنیزەك  فڕێنرابون  رزگاریان بوەو ئازاد كراون ،
هەوڵ و كۆششەكانی ئێمە لە یەكێتیی نیشتمانیی كوردستان  بۆ ئەوەیە هەوڵەكانی ھەموو لایەك بەحكومەتی ئیتحادی و حكومەتی ھەرێمی كوردستان و حزب و لایەنە كوردستانی و عێراقییەكان چڕتر بكرێنەوە بۆ دۆزینەوە و سۆراغی  ئەوانەی كە لە كارەساتەكەوە  تاكو  ئێستا بێسەرو شوێنن،  هەروەها كاری جدی بكرێت   لەپێناو ئاوەدانكردنەوەی  زیاتری گوندو شارۆچكە و شوێتی نیشتەجێونی  ئێزدییەكان و لە ژیانی ناو كەمپ و ئاوارەیی و بەكار هێنانیان وەك كارتی سیاسی  جۆراوجۆر  رزگار بكرێن و ژیانێكی  ئاسودە و فەراهەمیان  بۆ دابین  بكرێت  و كارو دەسەڵاتی شیاویان لە دەزگا  ئیدارییەكانیاندا  پێبدرێتەوە تاكو لە برین وناهەموارییەكانی سات و رۆژەكانی كارەساتەكەیان سارێژ بكرێتەوە.
ئەركێكی تر كە لەسەر شانی هەموانە ئەوەیە كە هەوڵەكانی پاراستنی   ئێزدییەكان و ناوچەكانیان زیاتربخرێنەگەڕ تا لە هەر هەڕەشەو پەلاماردانێكی تر كە ببێتە مەترسی لەسەر ژیانیان پارێزراو بن.
مەكتەبی سیاسی 
یەكێتیی نیشتمانیی كوردستان

PUKmedia