كەركوك..یەكێتی راپۆرتێك بۆ چارەسەری كێشەی خوێندنی كوردی دەداتە پەروەردەی هەرێم

بۆ چارەسەركردنی كێشەكانی خوێندنی كوردی لەكەركوك، وەفدێكی یەكێتیی نیشتمانیی كوردستان لەكەركوك سەردانی وەزارەتی پەروەردەی هەرێمی كرد.
لەبارەی سەردانەكەوە مامۆستا سەباح حەبیب پەرلەمانتاری یەكێتی لەكەركوك  و سەرۆكی وەفدەكە بە PUKmediaی راگەیاند: لەهەولێر لەگەڵ ئاللان حەمە سەعید وەزیری پەروەردە كۆبووینەوەو راپۆرتێكی گشتگیرمان لەبارەی كۆی كێشەكانی خوێندنی كوردی لەكەركوك پێشكەش كردو تەواوی كێشەو لەمپەرەكانی بەردەم خوێندنی كوردیمان پۆلێن كردوە.
وتیشی: داوامانكرد لەوەزیری پەروەردەی هەرێم كردوە هەنگاو بۆ چارەسەركرنیان بگرێتەبەرو لەكۆبوونەوەكەشدا وەزیری پەروەردە بەڵێنیدا كە دیراسەی كێشەكان بكات و هەنگاویش بۆ چارەسەركردنیان بنێت.
مامۆستا سەباح حەبیب سەرۆكی وەفدی یەكێتی لەكەركوك رونیشیكردەوە: لەو ڕاپۆرتەی ئامادەمانكردوە كێشەی میلاكاتی مامۆستایانی كەركوك و مووچەی مامۆستایانی كەركوك كە لەدەرەوەی شارەكە وەریدەگرن و كێشەكانی سەرپەرشتیاری پەروەردەیی و تاقیكردنەوەكانی لەخۆگرتوە.
ئەوەشی خستەڕوو: وەك یەكێتی ئامانجمانە كە خوێندنی كوردی لەكەركوك دەربازبكەین لەو كێشانەی هەیەتی و هەنگاوی پێویست بۆ زیاتر پێشخستنی بنرێت.
PUKmedia محەمەد ئەحمەد – كەركوك