ئەمریکا ستایشی قوباد تاڵەبانی دەکات بۆ بەگژداچونەوەی توندوتیژی خێزانی

جێگری سەرۆک وەزیرانی حکومەتی هەرێمی کوردستان رایگەیاند: وڵاتی هاوپەیمان و دۆستانی عیراق ڕۆڵی ئەرێنی بگێڕن لە نزیکردنەوەی بۆچوونی لایەنە عیراقییەکان.

ئەمڕۆ پێنج شەممە 16-6-2022 لە هەولێر قوباد تاڵەبانی پێشوازیکرد لە ئەلینا رۆمانۆسکی باڵیۆزی نوێی ئەمریکا لە عیراق و پرۆسەی سیاسی عیراق و پەیوەندییەکانی نێوان هەولێر و بەغدا_یان تاوتوێ کرد.

لەکۆبونەوەیەکدا جێگری سەرۆک وەزیران پیرۆزبایی لە ئەلینا رۆمانۆسکی کرد بەبۆنەی دەستبەکاربوونی وەک باڵیۆزی نوێی ئەمریکا لە عیراق و هیوای خواست لە ماوەی کارکردنیدا ئاستی پەیوەندییەکانی نێوان هەرێمی کوردستان و ئەمریکا لە بوارە جیاوازەکاندا بەرەوپێشچوونی زیاتر بەخۆیەوە ببینێت.

لەبارەی ئاستەنگەکەنای بەردەم پێکهێنانی حکومەتی نوێی عیراق قوباد تاڵەبانی رایگەیاند: لایەنە عیراقییەکان پێویستە ڕەچاوی هەستیاری دۆخەکە بکەن و بە نەرمی نواندن و کەمکردنەوەی ئاستی داواکارییەکانیان ڕێگری بکەن لە تێکچوونی سەقامگیری عیراق. داواشیکرد وڵاتی هاوپەیمان و دۆستانی عیراق ڕۆڵی ئەرێنی بگێڕن لە نزیکردنەوەی بۆچوونی لایەنە عیراقییەکان.

جێگری سەرۆک وەزیران جەختی کردەوە لەوەی پێویستە هەرێم و عیراق بەیەکجاری ناکۆکییەکان چارەسەر بکەن و لەسەر هەموو بابەت و کەرتەکان رێککەون.

هاوکات باڵیۆزی ئەمریکا پشتگیری تەواوی ئەمریکای بۆ هەرێمی کوردستان دووپات کردەوە و جەختی کردەوە لە پەرەپێدانی پەیوەندییەکان لە بوارە جیاوازەکاندا و ستایشی هەوڵەکانی جێگری سەرۆک وەزیرانیشی کرد بۆ بەگژداچوونەوەی توندوتیژی خێزانی.

PUKmedia