خوێندكارانی كۆلێژی یاسا داوای گۆڕینی بروانامه‌كانیان ده‌كه‌ن

خوێندكارانی كۆلێژی یاسای زانكۆی سلێمانی، داوا ده‌كه‌ن بڕوانامه‌كانیان بكرێته‌ دبلۆمی باڵا.

ئه‌مڕۆ 16-1-2022، ئه‌ژده‌ر محه‌مه‌د نوێنه‌ری خوێندكارانی كۆلێژی یاسای زانكۆی سلێمانی، له‌ كۆنگره‌یه‌كی رۆژنامه‌نووسیدا به‌ناوی خوێندكارانی كۆلێژی یاسای زانكۆی سلێمانییه‌وه‌ له‌ به‌یاننامه‌یه‌كدا داوای له‌ وه‌زاره‌تی خوێندنی باڵاو توێژینه‌وه‌ی زانستی حكومه‌تی هه‌رێم كرد، به‌وه‌ی بڕیاردراوه‌ خوێندنی به‌كالۆیۆرس له‌ یاسا بكرێته‌ پێنج ساڵ، بۆیه‌ بڕوانامه‌كانیان بكرێته‌ دبلۆمی باڵا.

راشیگه‌یاند؛ ماوه‌ی چه‌ند ساڵێكه‌ بڕیاردراوه‌ به‌زیادكردنی ساڵێكی دیراسی خوێندن له‌كۆلێژی یاسا، به‌ڵام هیچ ئیمتیازاتێك بۆ خوێندكاران زیادنه‌كراوه‌ و كاریگه‌ری نه‌بووه‌ له‌سه‌ر ئاستی زانستییان، بۆیه‌ لیژنه‌یه‌كییان پێكهێناوه‌ و چه‌ند داواكارییه‌كیان بۆ ئه‌و مه‌به‌سته‌ ئاڕاسته‌ی وه‌زاره‌تی خوێنی باڵاو توێژینه‌وه‌ی زانستی كردووه‌.

PUKmedia