Hikûmeta Sûriyê çekdarên zêdetir dişîne Dêr Hafirê

Rewangeha Sûrî

Çekdarên hikûmeta Şamê amadekariyan bo êrîşkirinê dikin

Hikûmeta Sûriyê leşkerên zêdetir ber bi sînorê Dêr Hafirê veguheztiye, û Rewangeha Sûrî bo Mafên Mirovan dibêje ku çekdar ji bo amadekariya operasyonek li dijî hêzên HSDê ji Ceble û Laziqiyê hatine veguhastin.

Rewangeha Sûrî bo Mafên Mirovan (SOHR) ragihan ku hikûmeta demkî ya Sûriyê leşkerên nû ber bi sînorê Dêrhafrê ve biriye û li gundên rojhilatê Helebê li dijî hêzên HSDê bi cih kiriye, daku amadekariya êrîşekê li ser deverên di bin kontrola HSDê de bikin.

Çavkaniyan aşkere kiriye ku ew hêz çekdarin û ji Lazqiye û Cebelê hatine anîn, hatina van hêzan bi xurtkirina sengerên leşkerî û pêşxistina operasyonên meydanî li ser sînor re hevdem e.

Ji aliyekî din ve, şeva borî li çend eniyan di navbera hêzên HSDê û çekdarên ser bi artêşa Turkiyê de alozî derket, HSDê got:Şeva borî û îro sibê du baregeh ji aliyê dronên Turkiyê ve hatine armancgirtin.

Ev yek jî di demekê de ye ku roja 6ê Çileya 2026an, çekdarên hikûmeta Şamê êrîşî taxên Eşrefiye û Şêx Meqsûd kirin û piştî berxwedaneke bêhempa ya endamên Hêzên Asayîşa Navxweyî, grûpên çekdar her du tax kontrol kirin û çend tawan jî encamdan.

PUKMEDIA