Fransa:Divê aliyên şerker li Helebê vegerin Peymana Agirbestê

North Press Agency

Dîmenek ji topbarankirina Şêx Meqsûd

Hikûmeta Fransa dilgiraniya xwe li ser destpêkirina şer û pevçûnan li taxa Şêx Meqsûd ya Helebê nîşan da û bang li hemû aliyan kir ku yekser vegerin peymana agirbestê.

Îro Şemî rêkefta (10-01-2026) an Wezareta Derve ya Fransa di daxuyanyekê de daxwaza gihandina alîkariyên mirovî û parastina akinciyên wan deveran kir.

Fransa piştgirîya pêşniyarên ku armanca wan parastina hemû sivîlên li Helebê ye, wekî ku hikûmeta Sûriyê soz daye, dike, her weha daxwaz kir ku destûr bê dayîn ku şervan bi awayekî "bi rûmet" ji herêmê vekişin.

Parîsê tekez kir ku ewê bi hevkarên xwe re, di serî de Wîlayetên Yekbûyî yên Amerîka, ji bo vegerandina ewlehî û aramiyê li Helebê di çarçoveya Sûriyeyeke yekgirtî, serwer û piralî de, berdewam be.

Ev helwesta Fransa di demekê de tê ku roja (06-01-2026) an de şer û pevçûnên dijwar di navbera artêşa Erebî ya Sûriyê û şervanên Kurd de li taxên Şêx Meqsûd û Eşrefiyê dest pê kirin û li gorî amarên herî dawî, ji ber pevçûnê zêdetirî 159 hezar kes koçber bûne.

Ev zêdebûn piştî astengkirina pêkanîna Peymana 10ê Adar ya sala 2025an tê ku taybet bû bo têkelkirina hêzên Kurdî di nav hikûmeta nû ya Sûriyê de.

Fransa, wek hevkarê navneteweyî, berê daxwaz kiribû ku hemû pêkhateyên Sûriyê di hikûmetê de nûnerên wan hebin û parastî bin.

PUKMEDIA