Ji bo çareserkirina krîzan diyaloga avaker berdewam dike

Nivîsgeha ragihandinê ya Serokkomariyê

Serokkomar pêşwazî li Sekreterê Konseya Bilind a Ewlekariya Neteweyî ya Îranê kir

Serokkomarê Îraqê, Dr. Ebdulletîf Cemal Reşîd, roja Duşemê 11ê Tebaxa 2025an li Qesra Bexdayê, pêşwaziya  Sekreterê Konseya Bilind a Ewlekariya Neteweyî ya Komara Îslamî ya Îranê, Dr. Elî Larîcanî û şandeya pê re kir.

Di destpêka civînê de, ku Şêwirmendê Ewlekariya Neteweyî  Îraqê Birêz Qasim El-Erecî û Cîgirê Wezîrê Karên Derve Îraqê Birêz Mihemed Husên Behr El-Ulum beşdar bûn, Larîcanî silavên Serokkomarê Îranê Birêz Mesûd Pezeşkiyan ji Serokkomar Dr. Ebdulletîf Cemal Reşîd re ragihand.Li bersiv de  Qedirbilind silavên xwe ji Serokkomar Pezeşkiyan û gelê Îranê re ragihand û ji wan re pêşketin û serfiraziya berdewam xwest. Wî tekezî li ser kûrahiya têkiliyên dîrokî û berjewendiyên hevpar ên di navbera Îraq û Komara Îslamî ya Îranê de, û her wiha ji bo pêşxistina çarçoveyên hevkariya dualî da ku xizmeta her du gelên cîran bike û ewlehî û aramiya herêmê xurt bike, pabendbûna Îraqê rave kir.

Serokkomar her wiha got ku Îraq bi hemû welatên cîran re siyaseta vebûna erênî pêş dixe, hevkariyên li ser bingeha berjewendiyên hevpar û rêzgirtina dualî ava dike, hevkariya aborî û ewlehiyê xurt dike, û beşdarî aştî û geşepêdana gelên herêmê dike.

Di hevdîtinê de, wan li ser pêşketinên herî dawî yên herêmî û navneteweyî nîqaş kirin, û girîngiya berdewamiya diyaloga avaker di navbera welatên herêmî de ji bo çareserkirina krîzan û xebata ji bo xurtkirina prensîbên rêzgirtina dualî û ne-destwerdanê di karûbarên navxweyî de tekez kirin.

Ji aliyê xwe ve, Dr. Larîcanî silavên serokatiya Îranê ji Serok re ragihand, û teqdîra welatê xwe ji bo helwestên piştgir ên Îraqê di xurtkirina ewlehiya herêmî de û rola wê ya girîng di nêzîkkirina nêrînên aliyên cûda de anî ziman. Wî her wiha spasî û teqdîra xwe ji gelê Îraqê re ji bo mêvanperweriya wan a ji bo heciyên Îranî di dema heca wan a Erbeînê de anî ziman.

PUKMEDIA