Wezareta Koçberan:15000 koçber ji Kampa Holê vegeriyan Êraqê

Ajans

Kampa Holê

Wezareta Koç û Koçberan ya Êraqê îro roja Yekşem rêkefta (27-07-2025) an di daxuyaniyekê de vegera berdewam ya koçberan ji Kampa Holê ya li başûrê parêzgeha Hesekê ya Rojavayê Kurdistanê ragihand û têde destnîşan kir ku 15 hezar Êraqî ji Kampa Holê vegeriyane welatê xwe ku 10 hezar ji wan vegeriyane deverên xwe, û tekez kir ku ev veger nîşanek e erênî ye daku ew koçber ji nû ve tevlî jiyana xwe ya civakî bibin.

Cîgirê Wezîrê Koç û Koçberan, Kerîm El-Nûrî, ji Ajansa Nûçeyan ya El - Êraqiye re got: Pêvajoya vegerandina koçberên ji Kampa Holê hîna jî berdewam e daku ew vegerin cih û warên xwe,her weha destnîşan kir ku Wezareta Koçberan rolek e mezin digel rêxistinên navneteweyî di vegerandina wan de ji bo cih û warên wan dilîze.

Navbirî destnîşan kir ku Wezareta Koçberan piraniya Êraqiyên li Kampa Holê bûn vegerandine deverên wan, ku ev nîşanek e erênî ye daku ew ji nû ve beşdarî jiayana civakî bibin.

Cîgirê Wezîrê Koç û Koçberan got: 15 hezar  Êraqî ji Kampa Holê hatine vegerandin, ku 10 hezar ji wan vegeriyane herêmên xwe, û hîna jî 5 hezar kesên din li kampa Ceda mane,niha kar ji bo amadekirina wan tê kirin daku piştre wan vegerînin cih û warên wan.

Navbirî got: Nêzîkî 18 hezar kes hîna jî li Kampa Holê mane, dema ku derfet çêbibin, piştî bi dawîbûna hûrbîniyên ewlehiyê di dosyeyên wan de, ji bo cih û warên ew jî dê bên vegerandin.

Kampa Holê yek ji kampên herî metirsîdar yên cîhanê tê hejmartin, ji ber ku malbatên çekdarên herî tundrew yên Dewleta Îslamî (DAIŞ), yên bi regez Sûrî, Êraqî û biyanî, têde hene, ew çekdar di heyva Sibata 2019an de di dema operasyona li dijî hêlîna dawîn yên çekdarên DAIŞê li bajarokê El-Baxozê hatibûn desteserkirin piştre ew ji bo Kampa Holê hatibûn veguhastin, heya niha çendîn welatên biyanî welatiyên xwe yên di nav rêzên DAIŞê de ji Rêvberiya Xweser wergirtin û ew vegerandin welatên wan.

PUKMEDIA