تەندروستی گەرمیان: بەزانیاری ناڕاست ماندبونمان ناشیرين دەكرێت

.

تەندروستی گەرمیان روونكردنەوەیەكی لەسەر چەند دەنگۆو هەواڵێك بڵاو كردەوە كەلەسەر خزمەتگوزاریەكانی نەخۆشخانەكانیان دەكرێت.

رونكردنه‌وه‌یه‌ك له‌ ته‌ندروستی گه‌رمیانه‌وه‌

بابه‌تی هاوڵاتیه‌كی گه‌رمیان بڵاوبوه‌ته‌وه‌ لە تۆڕە کۆمەڵایەتیەکان له‌باره‌ی گیانله‌ده‌ستدانی خاڵۆی به‌ نه‌خۆشی كۆرۆنا گوایا پاش ئه‌وه‌ی بێتاقه‌ت بوه‌ له‌ نه‌بونی پزیشك له‌ نه‌خۆشخانه‌ی قه‌ڵا، نه‌خۆشخانه‌ی به‌جێهێشتوه‌ و پاشان له‌ ماڵه‌وه‌ گیانی له‌ده‌ستداوه‌.

سه‌رباری پیشاندانی هاوخه‌می خۆمان بۆ كه‌سوكاری ئه‌و هاوڵاتیه‌ی كۆچی دوایی كردوه‌ و كه‌سوكاری سه‌رجه‌م نه‌خۆشانی تر كه‌ له‌م ماوەیە‌دا گیانیان له‌ده‌ستداوه‌، به‌ڵام به‌پێویستمان زانی به‌ به‌ڵگه‌وه‌ ئه‌م رونكردنه‌وه‌یه‌ بڵاوبكه‌ینه‌وه‌، به‌وپێیه‌ی سه‌رله‌به‌ری ئه‌م زانیاریانه‌ی بڵاوكراونه‌ته‌وه‌ ناڕاست و هه‌ڵبه‌ستراون.

1. ئه‌و هاوڵاتیه‌ ده‌ڵێت نه‌خۆشخانه‌كه‌ پزیشكی لێنه‌بوه‌، له‌راستی دا ئه‌مه‌ درۆ و بوختانه‌، چونكه‌ ئه‌و شه‌وه‌ به‌ڕێز (د. بینه‌ر ئیبراهیم مه‌حمود)، پزیشكی ئێشكگر، له‌ نه‌خۆشخانه‌كه‌دا ده‌وامی كردوه‌ و تۆماری ئاماده‌بون و ئیمزاكه‌یشی ده‌ریده‌خات كه‌ له‌ كاتژمێر (12ی شه‌و بۆ 8ی به‌یانی) له‌ كاردا بوه‌. لیستی تۆماره‌كه‌ش خراوه‌ته‌ڕو له‌ وێنه‌ی ژماره‌ (1).

2. ئه‌و شه‌وه‌ ئه‌و هاوڵاتیه‌ كۆچكردوە‌ له‌سه‌ر به‌رپرسیارێتی خێزانه‌كه‌ی ده‌ركراوه‌ و په‌یوه‌ندی به‌ نه‌بونی پزیشكه‌وه‌ نه‌بوه‌، چونكه‌ پزیشك و ستافی نه‌خۆشخانه‌كه‌ رێگه‌یان نه‌داوه‌ ده‌ربچێت به‌وپێیه‌ی نه‌خۆش ده‌بێت پزیشكی پسپۆڕ رێگه‌ی بدات بۆ ده‌رچون، به‌ڵام ئه‌وان پێداگیرییان كردوه‌ و كوڕێكی خوالێخۆشبو به‌ ناوی (شێركۆ) واژوی له‌سه‌ر ئه‌وه‌ كردوه‌ كه‌ باوكی له‌ نه‌خۆشخانه‌ ده‌ربكات له‌سه‌ر به‌رپرسیارێتی خۆی، وه‌ك له‌ وێنه‌ی ژماره‌ (2) دا رونكراوه‌ته‌وه‌.

3. ئه‌و هاوڵاتیه‌ كۆچكردوه‌، رۆژی (٤/٧/٢٠٢٠)‌ داخل كراوه‌ و 24 سه‌عات نه‌ماوه‌ته‌وه‌ و له‌سه‌ر پێداگیری و به‌رپرسیارێتی خێزانه‌كه‌ی له‌ نه‌خۆشخانه‌كه‌ ده‌ریانكردوه‌، له‌كاتێكدا هه‌مو پشكنینێكی بۆ كراوه‌ و پێویستی به‌ مانه‌وه‌ بوه‌ له‌ نه‌خۆشخانه‌ به‌هۆی بونی نه‌خۆشی دیكه‌ی درێژخایه‌ن و دڵ و پەککەوتنی گورچیلە. وه‌ك له‌ وێنه‌ی ژماره‌ (3) دا رونكراوه‌ته‌وه‌.

ئه‌م رونكردنه‌وه‌یه‌ بۆیه‌ بڵاوده‌كه‌ینه‌وه‌، بۆ ئه‌وه‌ی چه‌واشه‌ جێ به‌ راستی نه‌گرێت و هاوڵاتیان به‌ زانیاریی ناڕاست به‌ لاڕێدا نه‌برێن و چیتر نه‌خۆشخانه‌ی قه‌ڵا كه‌ ژماره‌یه‌ك دڵسۆزی ئه‌م شاره‌ دروستیان كردوه‌ و ژماره‌یه‌ك پزیشك و كارمه‌ندی دڵسۆز به‌ڕێوه‌ی ده‌به‌ن، ناشرین نه‌كرێت و دڵی ئه‌و ستافه‌ش سارد نه‌كرێته‌وه‌ له‌ خزمه‌ت.

به‌ڕێوبه‌رایه‌تی گشتی ته‌ندروستی گه‌رمیان

6/7/2020

PUKmedia راگەیەنراو