كۆمپانیای مایكرۆسۆفت هه‌موو لقه‌كانی له‌ جیهاندا داده‌خات

.

به‌ پێی هه‌واڵێكی ئاژانسی "ئه‌سۆشییه‌تێد پرێس"، هه‌ینی ڕابردوو كۆمپانیای مایكرۆسۆفت ڕایگه‌یاندووه‌ كه‌ نزیكه‌ی ته‌واوی لقه‌كانی له‌ جیهاندا به‌ شێوه‌یه‌كی هه‌میشه‌یی داده‌خات به‌هۆی ته‌شه‌نه‌كردنی ڤایرۆسی كۆرۆناوه‌.

له‌ هه‌واڵه‌كه‌شدا هاتووه‌ كه‌ پێشتریش وه‌ك هه‌موو ئه‌و كۆمپانیایانه‌ی بازرگانی به‌ ئامێری ئه‌لیكترۆنییه‌وه‌ ده‌كه‌ن، كۆمپانیا گه‌وره‌كه‌ی مایكرۆسۆفتی تایبه‌ت به‌ به‌رنامه‌سازی و دروستكردنی ئامێری ئه‌لیكترۆنی له‌ كۆتاییه‌كانی مانگی ئازاری ڕابردوودا ناچاربوو ته‌واوی لق و ناوه‌نده‌ خزمه‌تگوزارییه‌كانی به‌ شێوه‌یه‌كی كاتی دابخات به‌هۆی بڵاوبوونه‌وه‌ی په‌تای كۆڤید-19 وه‌. له‌ ئێستادا كۆمپانیاكه‌ 83 لقی له‌ ته‌واوی جیهاندا هه‌یه‌ كه‌ 72ی له‌ ویلایه‌ته‌ یه‌كگرتووه‌كانی ئه‌مریكایه‌ و ئه‌وانی دیكه‌ له‌ ده‌ره‌وه‌ی ئه‌مریكان كه‌ تێیاندا دواین ئامێره‌ ئه‌لیكترۆنیه‌كانی وه‌ك لاپتۆپ و كۆمپیوته‌ر و ته‌واوی به‌رهه‌مه‌كانی مایكرۆسۆفت نمایش ده‌كرێت و ده‌فرۆشرێت.

سه‌باره‌ت به‌و هه‌نگاوه‌ش به‌رپرسانی كۆمپانیاكه‌ هه‌نگاوه‌كه‌یان به‌ گۆڕانێكی ستراتیژی وه‌سفكردووه‌ له‌ بواری بازرگانی ئه‌لكترۆنی و ئاماژه‌یان به‌وه‌ داوه‌ به‌م شێوه‌یه‌ ده‌توانن له‌ ڕێگه‌ی ئۆنلاینه‌وه‌ كاڵا و به‌رهه‌مه‌كانیان نمایش بكه‌ن و بیفرۆشن له‌ پاڵ ئه‌وه‌شدا به‌ نیازن چوار له‌ گه‌وره‌ترین ناوه‌نده‌كانیان له‌ شاره‌كانی نیویۆرك و له‌نده‌ن و سیدنی و باره‌گای سه‌ره‌كیان له‌ ناوچه‌ی ڕیدمۆنه‌د له‌ واشنتۆن دووباره‌ بكه‌نه‌وه‌.

له‌ كۆتایدا مایكرۆسۆفت ڕایگه‌یاندووه‌ كه‌ سه‌رجه‌م كارمه‌نده‌كانی ئه‌و لقانه‌ له‌سه‌ر كاره‌كانیان ده‌مێننه‌وه‌ و هه‌لی كاركردنیان لێ زه‌وتناكرێت.

PUKmedia ئاژانسه‌كان