حاته‌می: پابه‌ندین به‌ پاراستنی ئاسایشی گه‌روی هورمز

.

وه‌زیری به‌رگریی ئێران ئاشكرایكرد، به‌ نیازن ڕێوشوێنه‌كانی تایبه‌ت به‌ پشتێنه‌ی ئه‌منی له‌ ناوچه‌ی كه‌نداو زیاتر بكه‌ن.

ئه‌میر حاته‌می وه‌زیری به‌رگریی ئێران، ڕایگه‌یاند: سه‌رجه‌م ڕێوشوێنه‌ ئه‌منییه‌كان بۆ سه‌قامگیربوونی ناوچه‌ی كه‌نداو گیراونه‌ته‌به‌ر و به‌ نیازن ڕێكاره‌كانی تایبه‌ت به‌ پشتێنه‌ی ئه‌منی له‌ ناوچه‌كه‌دا زیاتر بكه‌ن، وتیشی: ئێران پابه‌نده‌ به‌ پاراستنی ئاسایشی گه‌رووی هورمز.

وه‌زیری به‌رگریی ئێران له‌ به‌شێكی تری لێدوانه‌كه‌یدا ئاماژه‌ی به‌وه‌شدا، وڵاتانی ناوچه‌كه‌ له‌ توانایاندایه‌ دوور له‌ ده‌ستوه‌ردانی هێزی بیانی و ده‌ره‌كی، ئاسایشی وڵاته‌كانیان بپارێزن، به‌ پێویستیشی زانی وڵاتانی ناوچه‌كه‌، هه‌ماهه‌نگیان له‌ باره‌ی پاراستنی سنووره‌ هاوبه‌شه‌كاندا هه‌بێت.

PUKmedia ئاژانسه‌كانی ئێران