یەکێتیی مامۆستایان راگەیەنراوێکی بڵاوکردەوە

.

یەکێتیی مامۆستایانی کوردستان بەبۆنەی یادی ٥٨ مین ساڵیادی دامەزراندنیەوە راگەیەنراوێکی بڵاوکردەوە.

دەقی راگەیەنراو:

بەیاننامەی یەكێتی مامۆستایانی كوردستان 

بەبۆنەی (58)ەمین ساڵیادی دامەزراندنیەوە

جەماوەری كوردستان 

 مامۆستایانی دڵسۆز 

           یەكێتی مامۆستایانی كوردستان لە (15/5/2020)دا، پەنجاو هەشت ساڵ لە تەمەنی پڕ لەخەبات و نەپساوەی خۆی تەواو دەكات، بەدرێژایی ئەو ماوەیە بۆ یەك چركەش لەهەوڵدان و كاركردن بۆ بەدەستهێنانی ئامانجە پیشەیی و نیشتمانی و نەتەوەییەكان درێغی نەكردووە، قۆتاغ بەقۆناغ چ لە ریزەكانی بزوتنەوەی رزگاری خوازی گەلی كوردستان و خەباتی شار و شاخ چ لەدوای راپەڕین و كێشانەوەی دام و دەزگا ئیداری و پەروەردەییەكان لەلایەن رژێمی دكتاتۆری گۆڕبەگۆڕو ساڵەكانی دواترەوە . 

          بەڕێزان 

          هەموو لایەك ئەو راستیە دەزانن، لە سەرەتای ساڵی (2014)وە بەهۆی بڕینی بودجە لەلایەن حكومەتی مەركەزی و شەڕی تیرۆرستانی داعشەوە سەرباری دواكەوتنی موچە و پاشەكەوتكردنی زۆرەملێ، بەڵام مامۆستایان بەهزرێكی پاراو و بە روحیەتێكی پڕ لە میهرەبانی و لە روانگەی پەرۆشیان بۆ چارەنوسی نەوە و لاوە خوێن گەرمەكان، درێژەیان بە ئەركە پەروەردەییەكانی خۆیاندا و كۆششی ساڵانەی قۆتابیان و خوێندكارانیان مسۆگەر كرد، لە ژێر رۆشنایی ئەو راستیەی ئەوانە هیچ دەستێكیان لەو پێشهات و ئاڵۆزیانە نەبووە،نابێت ببنە قوربانی . 

           خۆشەویستان 

           دوای پێنج ساڵ لە دواكەوتن و پاشەكەوتی زۆرە ملێ تەنها یەك ساڵ پشو درا و لەو خەمە رەخسان، كەچی بەداخەوە جارێكیتر بۆ ماوەی دوو مانگە موچەكان زۆر دوادەكەون، راستە كۆڤید-19 هۆكاری بەشێكی سەرهەڵدانی ئەو كێشەیە، بەڵام بەشەكەیتری حكومەتی هەرێم و حكومەتی ناوەندیە كە لەلایەك دەبوو حكومەتی ناوەندی موچە و بژێوی ژیانی مامۆستایان و فەرمانبەران تێكەڵاو بە ئەجێندای سیاسی و ململانێ لابەلاكان نەكات و موچەی رەوانە كردبا، لەلایەكیتر دەبوو حكومەتی هەرێم هەژماری وردی بۆ رووداو و پێشهاتەكان بكردبا و پلانی جێگرەوەی دابڕشتبا و لێنەگەڕابا ئەم بارود‌وَخە ناهەموارە بەرۆكی هەموانی بگرێت. 

          مامۆستایان 

          یەكێتی مامۆستایانی كوردستان تەئكید لەسەر ئەو راستیە دەكاتەوە لە رابردوودا ئەگەر بەرامبەر بەماف و داخوازیەكان كاردانەوەی توند و خێرای نەبوو بێت،هەرگیز لەبەر هیچ كەس و لایەنێك نەبووە، تەنها و تەنها لەبەر بەرژەوەندی خوێندكاران و قوتابیان بووە، بەپێچەوانە هەموو هەنگاوەكانی خەباتی مەدەنی بەڕەوا زانیوە و ئێستاش كە لەبەر دەم قەیرانێكیترداین كە خۆی لەدواكەوتنی موچەكان دەبینێتەوە، هیچ دوو دڵ نیە لە بەكارهێنانی ئەو رێكار و پێدراوانە هەروەها ئاگاداركردنەوەی هەموو رێكخراوە نێو دەوڵەتیەكان بۆ بەرجەستە كردنی مافە رەواكان، بۆیە بە پێداگیریەوە داواكارە لە حكومەتی هەرێم : - 

1- رێككەوتن لەگەڵ حكومەتی ناوەندی بكات، بۆ ئەوەی بەپێێ‌ دەستور ماف و شایستە داراییەكانی هەرێمی كوردستان بنێردرێت و چیتر ژیان و گوزەرانی مامۆستایان و فەرمانبەران نەكەوێتە بەر مەترسیەوە .

2- مانگانە موچەكان لەكاتی خۆیدا بدات و چیتر دوای نەخات، ئەوەش لەبەر یەك راستی ئەویش ئەوەیە، نابێت وەك خۆیان دەژین سەیری مامۆستایان و فەرمانبەرانی بەش مەینەت بكەن، ناكرێت لە هاتنە پێشی هەر گریمانە و ئەگەرێك موچەخۆران قوربانی دۆخەكە بن ناشبێت لەوە زیاتر دوابخرێت بەپێچەوانەوە هەڵوێستی توندمان دەبێت . . 

3- بەفەرمی بڕی پاشەكەوتی مامۆستایان و فەرمانبەران دیاری بكرێت و لەهەژماری تایبەت بۆیان جێگیر بكرێت و لەكاتی گونجاودا بتوانن بەكاری بهێنن بۆ دانەوەی قەرز و باج و كرێ و رسوماتی خزمەتگوزاریەكان . 

4- لە ئایندەدا لەگەڵ ئاسایی بوونەوەی رەوشی دارایی پرۆسەی پلە بەرزكردنەوەی وەزیفی دەست پێبكاتەوە ئەوەشی لەسەرو بەندی وەستاندنیەوە نەدراوە، هەژماربكرێت و بە قۆناغ خەرجی بكاتەوە. 

5- كار بكات بۆ ئەوەی ئەو رەوشە دەرونیە نالەبارەی بەهۆی كۆڤید – 19 روداو و پێشهاتەكان بەرۆكی كۆمەڵانی خەڵك و تاكەكان گرتۆتەوە تا ئاسایی بێتەوە، چونكە خەڵكی كوردستان شایستەی ژیانی زۆر باشترن لەوەی ئێستا تیایدان لەبەرئەوەی كەمیان نەكردووە تاوەكو لەوە زیاتر جەزرەبە بدرێن.

6- كاری لێبڕانەوە بكات بۆ جێبەجێكردنی یاسای چاكسازی، بۆ ئەوەی ئەوانەی چەندین ساڵە لەخێر و بێری ئەم هەرێمە و لەسەر حسابی موچەخۆری شایستە دەژین، چیتر بواریان پێ نەدرێت و هەر یەكە و بە قەد ماندووبوونی خۆی بەهرەمەند بێت.

7- خزمەتی وانەبێژان لە بەرچاو بگرێت كە چەندین ساڵە پارسەنگی پرۆسەی پەروەردەیان راگرتوە و نەیان هێلاوە كەلێنی تیا دروست بێت فەرمانی دامەزراندنیان بۆ دەر بكات.

8- دەست بەدابەشكردنەوەی زەوی نیشتەجێبوون بكات، بۆ ئەوەی ئەو مامۆستایانەی تا ئێستا وەریان نەگرتووە و شایستەن، لێیەوە سودمەندبن . 

9- دەبێت دەستكاری یاسای خانەنشینی بكات، لەبەر ئەوەی جیاوازیەكی زۆر لەهەرێم لەنێوان خانەنشینان هەیە بەشێوەیەك ئەوانەی شایستەن و بە خزمەتی خۆیان خانەنشین بوون موچەكانیان زۆر كەمترە لەوانەی كە بەناهەق خانەنشین بوون هەروەها لەگەڵ حكومەتی ناوەندیش.

10- بایەخی تەواو بە پرۆسەی پەروەردە و مامۆستایان لەناوچە دابڕێنراوەكان بدات كە لە ئێستادا جیاوازیەكی زۆر لە مافە پێدراوەكانی هەرێم و ئەو دەڤەرانە هەیە و هەست بە پەراوێزخستن دەكەن . 

          بەڕێزان یەكێتی مامۆستایان لە پەنجاو هەشتەمین ساڵیادیدا سڵاو بۆ گیانی پاكی شەهیدانی گەلی كوردستان بەگشتی و مامۆستایانی شەهید و شەهیدانی روبەڕوبوونەوەی تیرور دەنێرێت هەروەها درودیش بۆ گیانی پاكی مامۆستا كۆچكردووەكان، هیوای تەمەن درێژیش بۆ مامۆستایانی خانەنشین دەخوازێت، رێز و تەقدیریش لە یەك بەیەكی مامۆستایان دەگرێت، جەخت لەسەر ئەوەش دەكاتەوە كە نابێت ماندووبوون و بێ هیوایی هیچ یەكێك سارد بكاتەوە و دەبێت بەردەوام لەكاردابن، لەلایەك بۆ مسۆگەر كردنی مافەكان لەلایەكیتر بۆ خزمەتكردنی نەوەكان. 

پیرۆزە ئەم یادە هەر بژین و سەركەوتوبن 

 یەكێتی مامۆستایانی كوردستان         

  مەكتەبی سكرتاریەت 

 14ی ئایاری 2020 

PUKmedia  راگەیەنراو