حاكمی نیویۆرك: هێشتا مه‌ترسی كۆرۆنا له‌ وڵاتدا به‌رده‌وامه‌

.

حاكمی ویلایه‌تی نیویۆرك داوای له‌ هاووڵاتیان كرد، درك به‌ مه‌ترسییه‌كانی ڤایرۆسی كۆرۆنا بكه‌ن و روونیشیكرده‌وه‌: ئه‌سته‌مه‌ به‌م نزیكانه‌ جموجۆڵی بازرگانی له‌ ویلایه‌ته‌كه‌ ده‌ستپێبكاته‌وه‌.

ئه‌ندرۆ كۆمۆ حاكمی ویلایه‌تی نیویۆرك، رایگه‌یاند: ئاشكرایه‌ هاووڵاتیان به‌هۆی بێكاریی گوزه‌رانیان خراپه‌، به‌ڵام پێویسته‌ درك به‌وه‌ بكرێت كه‌ هێشتا مه‌ترسی ڤایرۆسی كۆرۆنا به‌رده‌وامه‌، به‌تایبه‌ت له‌ ویلایه‌تی نیویۆرك، وتیشی: ناكرێت له‌گه‌ڵ كه‌مبوونه‌وه‌ی حاڵه‌ته‌كانی تووش بون و گیان له‌ده‌ستدان به‌ ڤایرۆسی كۆرۆنا، راسته‌وخۆ ژیان ئاسایی بكرێته‌وه‌.

 لێدوانه‌كه‌ی حاكمی ویلایه‌تی نیویۆرك له‌كاتێكدایه‌، كه‌ جموجۆڵی بازرگانی له‌ ویلایه‌ته‌كانی ته‌كساس و جۆرجیا، ئاسایی بۆته‌وه‌.

ئه‌ندرۆ كۆمۆ حاكمی ویلایه‌تی نیویۆرك، له‌به‌شێكی تری لێدوانه‌كه‌یدا راشیگه‌یاند: به‌پێی ئاماره‌كان، له‌ ئێستادا رۆژانه‌ نزیكه‌ی 900 حاڵه‌تی نوێی توش بوو به‌ ڤایرۆسی كۆرۆنا، له‌ نه‌خۆشخانه‌كانی نیویۆرك، تۆمار ده‌كرێت.

PUKmedia ئاژانسه‌كان