پەرلەمانتارێكی یەكێتی:بۆ دۆخی ناوچە دابڕێنراوەكان هۆشداریمان داوەتە سوپا

.

پەرلەمانتارێكی كەركوكی فراكسیۆنی یەكێتی رایدەگەیەنێیت: سەبارەت بە دۆخی خراپی ئەمنی سنوری قەزای داقوق و ناوچە دابڕێندراوەكان هۆشداریمان بەحكومەتی عیراق داوە.

ئەڵماس فازڵ، ئەندامی فراكسیۆنی یەكێتی نشتیمانی كوردستان لەپەرلەمانی عیراق، رایگەیاند: لەگەڵ جموجۆڵەكانی تیرۆرستانی داعش لە سنوری قەزای داقوق و حەوزی حەمرین و ناوچەدابڕێنراوەكان لە چەندین كۆبونەوەو دیدارو بەنوسراویش هۆشداریمان بەحكومەتی عیراق دا لەخراپی دۆخی ئەمنی سنورەكە .

وتیشی: حكومەتی عیراقمان ئاگاداركردۆتەوە كە پێویستە  بەهاوبەشی لەگەڵ هێزەكانی پێشمەرگە و هاوپەیمانانی دژ بەداعش، هەنگاوی كرداری بگیرێتە بەر  بۆ ئەوەی مەترسی لە سنوری داقوق و كەركوك دووربخاتەوە.

ئەو پەرلەمانتارە ئاماژەی بۆ ئەوەشكرد: بۆ بەرەنگاربوونەوەی داعش و نەهێشتنی مەترسیەكانی پێویستە پەلە بكرێیت لە دروستكردنی ژووری هاوبەشی ئۆپراسینۆنەكان لەنێوان هێزی پێشمەرگەی كوردستان و سوپای عیراق .

دەشڵێت: هێزی پێشمەرگە چەندین ساڵ لە سنورەكە بوون و شارەزای جوگرافیا و شەڕی دژ بەداعشن و ئەزمونی سەركەوتنی داعشیان هەیە، بۆیە قورسە بەبێ ئەو هێزە بتوانرێیت تەواوی سنورەكە كۆنترۆڵ بكرێیت و مەترسیەكانی تیرۆرستان دووربخرێیتەوە.

ئەڵماس فازڵ، ئەوەشی رایگەیاند: پێویستە هەرێمی كوردستان لە دانوستاندنەكانیدا بۆ پێكهێنانی حكومەتی نوێی عیراق، بابەتی ئاسایكردنەوەی دۆخی كەركوك و ناوچە دابەڕێنڕاوەكان و دۆخی ئەمنی سنورەكەو بەشداریكردنی هێزی پێشمەرگە لە پاراستنی سنورەكە لە ئەولەیەتی داوكارییەكانیان بێیت.

PUKmedia