كه‌نه‌دا.. رێژه‌ی گیانله‌ده‌ستدان به‌هۆی كۆرۆناوه‌ له‌هه‌ڵكشاندایه‌

.

به‌رپرسانی ته‌ندروستی فیدراڵی كه‌نه‌دا پێشبینی ده‌كه‌ن تا 16 ی نیسانی ئه‌م مانگه‌ نزیكه‌ی 32 هه‌زار حاڵه‌تی توشبوون به‌ ڤایرۆسی كۆرۆنا تۆمار ده‌كرێت له‌و ژماره‌یه‌ش ڕه‌نگه‌ 700 حاڵه‌تی گیان له‌ده‌ستدان ڕوو بدات ، ئه‌مڕۆ 9 ی نیسانی 2020، له‌كۆنگره‌یه‌كی رۆژنامه‌وانیدا كه‌ دكتۆره‌ تێریزا تام سه‌رۆكی ته‌ندرووستی گشتی كه‌نه‌دا و جێگره‌كه‌ی د.هوارد نه‌جۆ و هه‌روه‌ها ستیڤن لۆكاس جێگری وه‌زیری ته‌ندرووستی حكومه‌تی فیدراڵی به‌شدارییان تێدا كرد و راسته‌وخۆ له‌ كه‌ناڵه‌كانی ڕاگه‌یاندن بڵاوكرایه‌وه‌ ، به‌رپرسانی ته‌ندرووستی ڕایانگه‌یاند ' به‌پێی پشكنین و لێكۆڵینه‌وه‌كان وانیشان ده‌درێت له‌ هه‌فته‌ی داهاتوودا حاڵه‌ته‌كانی توشبوون و مردن به‌ ڤایرۆسی COVID-19 زۆر له‌وه‌ی پێشبینی ده‌كرا زیاتر بێت، هه‌روه‌ها ئاشكراشیان كرد كه‌ هه‌رێمی ئۆنتاریۆ وه‌كو نموونه‌ پێشبینی ده‌كرێت به‌ هۆی بڵاوبوونه‌وه‌ی ڤایرۆسی كۆرۆنا له‌ماوه‌ی دوو ساڵی داهاتوودا له‌ 3 هه‌زاره‌وه‌ بۆ 15 هه‌زار حاڵه‌تی مردن ڕووبدات .  دوكتۆره‌ تام وتی ' تێگه‌یشتنمان بۆ بڵاوبوونه‌وه‌ی په‌تای كۆرۆنا به‌م شێوازه‌ی ئێستا كه‌ له‌به‌ر ده‌ستدایه‌ گه‌یشتووینه‌ته‌ ئه‌و ڕاستییه‌ی كه‌ ڤایرۆسه‌كه‌  له‌ناو كۆمه‌ڵگا زۆر به‌خێرایی ته‌شه‌نه‌ ده‌كات  سه‌ڕه‌ڕای ئه‌و هه‌وڵ ته‌قه‌لایه‌ی به‌رپرسانی وه‌زاره‌تی ته‌ندرووستی و حكومه‌ت بۆ ڕێگرتن له‌ بڵاوبوونه‌وه‌ی ڤایرۆسه‌كه‌ ده‌دات . ئه‌م ئاگادارییه‌مان چه‌ندین جار به‌ جه‌ستتن ترۆدۆ سه‌رۆكی حكومه‌ت ڕاگه‌یاندووه‌ كه‌ خێرایی بڵاوبوونه‌وه‌ی ڤایرۆسه‌كه‌  له‌ ڕاده‌به‌ده‌ر ده‌بێت ئه‌گه‌رهه‌نگاوی توند بۆ ڕێگرتن له‌ بڵاوبوونه‌وه‌ی ڤایرۆسه‌كه‌ نه‌گیرێت و هاوڵاتیان زیاتر پابه‌ندی ڕێنماییه‌كانی خۆپارێزی ته‌ندرووستی نه‌بن به‌تایبه‌تیش مانه‌وه‌یان له‌ ماڵه‌وه‌ ودووركه‌وتنه‌وه‌ له‌یه‌كتر و شووشتنی ده‌سته‌كان ته‌نها ڕێگه‌یه‌ بۆ پاراستنی ژیانیان.

PUKmedia عوسمان عه‌لی، توڕونتۆ
CBCNEWS كه‌نه‌دا