سعودیه‌ ئاماده‌یی پیشانداوه‌ به‌رهه‌مهێنانی نه‌وت كه‌مبكاته‌وه‌

.

سه‌رچاوه‌یه‌كی ئاگادار له‌ سیاسه‌تی وڵاتی سعودیه‌ ئاشكرایكردووه‌ كه‌ شانشینی عه‌ره‌بی سعودیه‌ ئاماده‌یی پیشانداوه‌ كه‌ ئاستی به‌رهه‌مهێنانی نه‌وت له‌مانگی نیساندا بۆ 4 ملیۆن به‌رمیل نه‌وت كه‌مبكاته‌وه‌.

سه‌رچاوه‌كه‌ راشیگه‌یاندوه‌ كه‌ سعودیه‌ ئاماده‌یه‌ به‌رهه‌مهێنانی نه‌وت كه‌مبكاته‌وه‌ به‌مه‌رجی پشتبه‌ستنییه‌تی به‌ به‌رزترین ئاستی به‌رهه‌مهێنانی نه‌وتی له‌مانگی نیساندا كه‌ بڕه‌كه‌ی ده‌گاته‌ 12.3 ملیۆن به‌رمیل له‌رۆژێكدا.

هاوكات له‌گه‌ڵ  هاتنه‌پێشی ئه‌م هه‌ڵوێسته‌ی سعودیه‌،  ئه‌مڕۆ 9-4-2020، كۆبوونه‌وه‌ی نائاسایی وڵاتانی به‌رهه‌مهێنی نه‌وت (ئۆپیك) به‌ڕابه‌رایه‌تی روسیا و سعودیه‌ كۆبوونه‌وه‌ی نائاسایی له‌پێناو سه‌قامگیركردنی بازاڕی نه‌وت ئه‌نجام ده‌درێت.

 له‌مباره‌یه‌وه‌، موحه‌مه‌د عه‌رقاب وه‌زیری وزه‌ی جه‌زائیر رایگه‌یاندوه‌: ئامانج له‌كۆبوونه‌وه‌كه‌ی ئه‌مڕۆ گه‌یشتنی وڵاتانی ئۆپیكه‌ به‌رێككه‌وتن و كه‌مكردنه‌وه‌ی  بڕێكی زۆر له‌به‌رهه‌مهێنانی نه‌وت.

عه‌رقاب راشیگه‌یاندوه‌ كه‌ كه‌مكردنه‌وه‌ی ئه‌و بڕه‌ زۆره‌ له‌به‌رهه‌مهێنانی نه‌وت، ده‌توانێت هاوسه‌نگی بگه‌ڕێنێته‌وه‌ بۆ بازاڕ، ئه‌مه‌ش له‌ به‌رژه‌وه‌ندی وڵاتانی  به‌رهه‌مهێن و به‌كاربه‌ردایه‌.

هیوایه‌ك هه‌یه‌ كه‌ وڵاتانی ئۆپیك له‌سه‌ر كه‌مكردنه‌وه‌ی به‌رهه‌مهێنان و پاڵپشتیكردن له‌بازاڕی نه‌وت بگه‌نه‌ رێككه‌وتن، بۆیه‌ ئه‌مڕۆ  نرخی نه‌وت له‌بازاڕه‌كانی جیهاندا به‌رزبوونه‌وه‌یه‌كی به‌خۆوه‌ بینی، له‌كاتێكدا ماوه‌یه‌كه‌ به‌هۆی بارودۆخی بڵاوبوونه‌وه‌ی ڤایرۆسی كۆرۆناوه‌ داواكاری له‌سه‌ر نه‌وت كه‌میكردووه‌.

دوو رۆژیشه‌  نرخی تێكه‌ڵه‌ی (برنت) به‌ڕێژه‌ی  له‌ 1.2 به‌رزبۆته‌وه‌ گه‌یشتۆته‌ 33.25 دۆلار.

PUKmedia رۆیته‌رز