كه‌نه‌دا.. تا كۆتایی مانگی چوار 300 هه‌زار تووشبوو تۆمار ده‌كرێت

.

رۆژی 3 ی نیسانی 2020 وه‌زاره‌تی ته‌ندرووستی هه‌رێمی ئۆنتاریو له‌ كۆبوونه‌وه‌یه‌كدا له‌گه‌ڵ داك فۆرد سه‌رۆكی حكومه‌تی ئۆنتاریۆ و ژماره‌یه‌ك پسپۆڕانی ته‌ندروستی له‌ كه‌ناڵه‌كانی ڕاگه‌یاندن بڵاوكرایه‌وه‌ كریستینا ئێلۆت وه‌زیری ته‌ندرووستی هه‌رێمی ئۆنتاریۆ ڕایگه‌یاند، پێشبینی ده‌كرێت تا كۆتایی مانگی نیسان نزیكه‌ی 300 هه‌زار تووشبوو به‌ ڤایرۆسی كورۆنا له‌ هه‌رێمی ئۆنتاریو تۆمار ده‌كرێت ، سه‌ره‌ڕای ئه‌و هه‌وڵانه‌ی ئێستا بۆ به‌ره‌نگاربوونه‌وه‌ی ڤایرۆسه‌كه‌ ده‌درێت ڕه‌نگه‌ 1600 كه‌س گیان له‌ده‌ست ده‌ده‌ن . هه‌روه‌ها وتشی ژماره‌ی تووشبووان به‌ ڤایرۆسی كورۆنا  له‌ هه‌ڵكشاندایه‌ و ته‌نها له‌ هه‌رێمی ئۆنتاریو 3630 حاڵه‌ت تۆمار كراوه‌  كه‌ 897 تووشبوو له‌ شاری توڕۆنتۆ دان و 97 كه‌سیش له‌و ژماره‌یه‌ گیانیان له‌ده‌ستداوه‌، بۆیه‌ جه‌خت ده‌كه‌ینه‌وه‌ پێویسته‌ هاوڵاتیان  زیاتر پابه‌ندی ڕێنماییه‌كانی ده‌زگا ته‌ندرووستییه‌كان بن بۆ خۆپارێزی له‌ تووشبوون به‌ ڤایرۆسی كۆرۆنا  .

هه‌مان ڕۆژ پسپۆڕانی ته‌ندرووستی  ماتیۆ ئه‌ندرسۆن سه‌رۆكی ته‌ندروستی گشتی هه‌رێمی ئۆنتاریۆ و ئادلیشتاین براون ڕاگری به‌شی پزیشكی له‌ زانكۆی تورونتۆ و دوكتۆر پیتی دۆنیلی به‌ڕێوبه‌ری گشتی ته‌ندرووستی هه‌رێمی ئونتاریۆ كۆنگره‌یه‌كی رۆژنامه‌وانییان ئه‌نجامداو ئه‌و هه‌واڵه‌یان پشت ڕاستكرده‌وه‌ كه‌ له‌ هه‌رێمی ئۆنتاریۆ پێشبینی ده‌كرێت كه‌ سه‌دان هه‌زار كه‌س تووشی COVID-19 ده‌بن له‌و ژماره‌یه‌ش پێده‌چێت له‌ 3 هه‌زاروه‌ بۆ 15000 كه‌س به‌و په‌تایه‌ گیان له‌ده‌ست ده‌ده‌ن ، هه‌روه‌ها ڕاشیانگه‌یاند پێشبینی ده‌كرێت ئه‌م په‌تایه‌  تا ماوه‌ی دوو سالێش درێژه‌ بكێشێت . دوكتور دۆنلی ئاماژه‌ی به‌وه‌دا كه‌ ئێستا هیچ جۆره‌ ڤاكسینێك نییه‌ بۆ ڕاگرتنی بڵاوبوونه‌وه‌ی ڤایرۆسی كۆرۆنا ته‌نانه‌ت چاره‌سه‌ركردنی دیاری كراویش نییه‌ بۆ تووشبووان ، هه‌وڵه‌كان بۆ چاره‌سه‌ركردن به‌رده‌وامه‌ به‌ڵام پێویسته‌ هاوڵاتیانیش پابه‌ندی ڕێنماییه‌كانی خۆپارێزی بن و له‌ماڵه‌وه‌ بمێنن . ئه‌گینا ڤایرۆسه‌كه‌ زیاتر ته‌شه‌نه‌ ده‌كات  ژماره‌كه‌ش له‌ پڕێكدا ده‌گاته‌ 15000  حاڵه‌تی گیان له‌ده‌ستدان له‌ هه‌رێمی ئۆنتاریۆ .

PUKmedia عوسمان عه‌لی ، تورۆنتۆ
كه‌ناڵی CP24