ئاسايشی گەرمیان دەستگیركردنی تیرۆرستێكی مەترسیداری راگەیاند

.

بەڕێوبەری ئاسایشی گەرمیان لەكۆنگرەیەكی رۆژنامەوانیدا دەستگیركردنی تیرۆرستێكی مەترسیداری داعشی راگەیاند.

لیوا نەوشیروان ئەحمەد بەڕێوبەری ئاسایشی گەرمیان لەكۆنگرەیەكی رۆژنامەوانیدا رایگەیاند:" بەپێی زانیاری وردی هەواڵگری تیرۆرستێكی داعشمان لەناحیەی رزگاری سەربە قەزای كەلار دەستگیركردوە".

رونیشكردوەتەوە:" ئەو تیرۆرستە لەچەند شەڕێكی سنوری ناحیەی جەلەولا بەشداریكردوەو  زیانیان بەهێزەكانی پێشمەرگە گەیاندبوو، تەنانەت  دانی بەوەشدا ناوە كە لەیەكێك لەو شەڕانەدا برینداربووە".

ئاماژەی بەوەشدا:" ئەو تیرۆرستەی داعش تەنانەت چووەتە نەینەواو چەند ئەركێكی سەربازی لەئەستۆ گرتووە، پاشان چووەتە سوریاو لەوێشدا بەهەمان شێوە لەریزەكانی داعشدا كاریكردوە".

بەڕێوبەری ئاسایشی گەرمیان ئەوەی ووت:" دواتر گەڕاوەتەوەو لەناحیەی رزگاری، خۆی كردوەتە كوێرو ناسنامەو تەواوی شوناسی خۆی گۆڕیبوو، بەڵام لەڕێگەی زانیاری وردەوە ناسیومانەتەوەو دەستگیرمان كردوە".

باسی لەوەشكرد:" روبەڕووی دادگامان كردوەتەوە".

لەلایەكی تریشەوە باسی لەدەستگیركردنی ئەو باندەی رفاندنی مرۆڤ كرد، كەلەسنوری ناحیەی قادر كەرەم هاووڵاتیەكیان رفاندو، كە سێ لەئەندامەكانیان دەستگیركراون و لەئێستادا بەدوای دوو كەسی تری ئەو باندەوە دەگەڕێن و لەهەر كوێدا دەستیان پێبگات دەستگیریان دەكەن و روبەڕووی دادگایان دەكەنەوە.

بەڕێوبەری ئاسایشی گەرمیان ستایشی رۆڵی خەڵكی سنوری گەرمیان كرد كە دڵسۆزانە هاوكارو هەماهەنگیانن.

PUKmedia تایبەت