تێنسزانه‌ تازه‌پێگه‌یشتوه‌كانى عیراق به‌ره‌و به‌حره‌ین فڕین

هه‌ڵبژارده‌ى تازه‌پێگه‌یشتوانى عیراق بۆ تۆپى سه‌رمێز ئه‌مرۆ چوارشه‌ممه‌ له‌ رێگه‌ى فرۆكه‌خانه‌ى نێوده‌وڵه‌تى به‌غداده‌وه‌ به‌ره‌و مه‌نامه‌ى پایته‌ختى به‌حره‌ین گه‌شتى كرد به‌مه‌به‌ستى به‌شداریكردن له‌ پاڵه‌وانێتى خۆرئاواى ئاسیا كه‌ یارییه‌كانى سبه‌ى پێنجشه‌ممه‌ ده‌ستپێده‌كات و ماوه‌ى سێ رۆژ به‌رده‌وامه‌ .

به‌ڵێن حه‌یده‌ر ، راهێنه‌رى تازه‌پێگه‌یشتوانى كچانى عیراق له‌ لێدوانێكى تایبه‌ت ئاشكرایكرد ، عێراق به‌ ئاستى كوڕان و كچان له‌و پاڵه‌وانێتییه‌ به‌شداریكردووه‌ ، راهێنه‌رى هه‌ڵبژارده‌ى كوڕان به‌خشراوه‌ به‌نده‌ ( به‌لێن حه‌یده‌ر) و له‌سه‌ر ئاستى تیپى كوڕانیش هه‌ڵبژارده‌كه‌ دوو یاریزانى كوردى تێدایه‌ ئه‌ویش ئارۆو ئه‌شكانن .

وتیشى؛ پێش گه‌شته‌كه‌مان كه‌مپی مه‌شق و راهێنان بۆ هه‌ردوو هه‌ڵبژارده‌كه‌ كراوه‌ته‌وه‌و چاومان له‌ ئه‌نجامى به‌رزه‌ له‌و پاڵه‌وانێتییه‌ كه‌ وه‌ك پاڵاوتن بۆ پاڵه‌وانێتى ئاسیا بۆ ته‌مه‌نى نۆزده‌ ساڵان هه‌ژمار ده‌كرێت .

پاڵه‌وانێتیی خۆرئاواى ئاسیا له‌سه‌ر ئاستى كوڕان به‌حره‌ین وعمان وعیراق و فه‌له‌ستین و قه‌ته‌ر به‌شدارن و له‌سه‌ر ئاستى كچانیش  به‌حره‌ین وعیراق و ئه‌رده‌ن  وسوریا به‌شدارى ده‌كه‌ن .

به‌شى وه‌رزش- تایبه‌ت