هەردوو شەهید جەمالی عەلی باپیر و شەهید مورسەل سومبلی شەهیدانی وەرزشكارن

کوردستان 02:25 PM - 2021-11-22


ئەگەر بمانەوێت بەكاروانە پڕ سەروەرییەكەی شەهیدانی (ی، ن،ك) دا گوزەرێكی خێرا بكەین، سەدان و بگرە هەزاران شەهیدی وەرزشكاریش لەو كاروانە پڕ سەروەرییەدا جێگای شیاویان گرتووەو ناویان لە لیستە بێ كۆتاییەكەی ئەو شەهیدانەدا دیارو بەرچاوە و كاروانەكەیان جوانتر و درەوشاوە تر كردووە.

ئێمە لێرەدا دوو شەهیدی دیارو بەرچاوی كاروانە پڕ سەروەرییەكەی شەهیدانی (ی، ن،ك) وە دوو سومبولی شەهیدی وەرزشكار و وەك دوو شەهیدی سەركردە و پێشڕەوی شەهیدانی (ی، ن،ك) وەبیر هەمووان دەهێنینەوە و ژیاننامەكانیان دەخەینەوە یادی هەموو لایەك.

شەهید جەمالی عەلی باپیر
رۆژی 20/8/2017 ئەو رۆژە شومە بوو كە تیایدا هەواڵێكی دڵ تەزێن لەناكاو خۆی كرد بەناو شاری سلێمانی و تەنانەت سەرجەم شار و شارۆچكەكانی كوردستاندا ئەوەیش ئەوە بوو؛ جەمالی عەلی باپیر شەهید بووە.

هەواڵەكە هەروا هەواڵێكی سادەو راگوزەر نەبوو، بەڵكو هەواڵێكی دڵ تەزێن بوو، هەمووانی تاساند هەمووانی توشی شۆك كرد بەتایبەتی توێژی وەرزشكاران.

شەهید جەمالی عەلی باپیر لە ناوەندی وەرزشدا كەسایەتییەكی روخۆش و قسە خۆش و دیار و وەرزشكارێكی بەتواناو خۆشەویستی هەمووان بوو، لە هەر یارییەكدا بەتایبەتی تۆپی پێ و گۆڕەپان ومەیدان یاریی كردبێت لەئاست و ئەداو پابەند بوونەدا لە لووتكەدا بووە.

شەهیدی نەمر ساڵی 1945 لەگەڕەكی شێخان لە سلێمانی لەدایكبووە، هەرلەسەرتای منداڵییەوەو لەسەردەستی شەهید مامۆستا یاسینی مامۆستای كە ئەمیش وەرزشكار و كەسایەتییەكی سیاسی و كورد پەروەر بوو، وەرزش و كوردایتی پێكەوە گرێداوە.

ساڵی 1960 چۆتە ریزەكانی ئەوسای پارتی دیموكراتی كوردستان، ساڵی 1962 سەنگەری شاری گواستۆتەوە بۆ شاخ، هەرچەندە تەمەنی 17 ساڵیشی تەواو نەكردبوو.

ساڵی 1964 كاتێك ناكۆكی دەكەوێتە نێو ریزەكانی پارتی ئەوسا، ئەم باڵی(م.س) هەڵدەبژێرێت و دواتر چۆتە دیوی ئێران و دواتر دەگەڕێتەوە سلێمانی و خوێندن و پێشمەرگایەتی و وەرزش پێكەوە گرێدەدات .

لەو سەردەمەدا خزمەتێكی زۆری وەرزش دەكات و دوو تیپ بە ناوی شەهید كەمال سەلیم و تیپێكی تر بەناوی چوار چرا وە لەگەڕەكی ئیسكان درووستدەكات، لە ئەلعابی پۆلیسی سلێمانیش دەبێتە یاریزان و تیپەكە زۆر گەشە دەكات و تا دەبێتە یەكێك لە تیپە هەرەباشەكانی سلێمانی وكوردستان و عیراقیش.

ساڵی 1968 بەبڕیاری باڵی مەكتەبی سیاسی لە بەغدا دەچێتە خولێكی مفەوەزی و پاش تەواو كردنی خولەكە پلەی مفەوەز وەردەگرێت و لە ئەلعابی پۆلیسی سلێمانی درێژە بە خزمەتەكردنی وەرزش و كارەكەی دەدات.

لەگەڵ درووستبوونی شانە نهێنییەكانی كۆمەڵەی ماركسی لینینی كوردستان، ئەم لەو رێكخراوەدا چالاكانە كاری نهێنی حزبی رادەپەڕێنێت.

پاش كۆتاییهاتنی كفتو گۆی شۆڕش و حكومەتی عیراق لەمانگی ئازاری ساڵی 1974 و دەستپێكردنەوەی شۆڕشی چەكداری، ئەم جارێكی تر تفەنگی پێشمەرگایەتی دەكاتەوە شان و دەبێتەوە بەپێشمەرگە تا نسكۆی شۆڕش.

پاش نسكۆ دەگەڕێتەوە ناو شارو دواتر لەگەڵ هاوڕێكانی دووردەخرێتەوە بۆ باشووری عیراق و لە پلەی مفەوەزی لادەبرێت و دەكرێتە فەرمانبەر لە بەڕێوەبەرێتی پۆستەو گەیاندن لە شاری بەسرە.

شەهیدی نەمر هەر پاش هەڵگیرسانەوەی شۆڕشی نوێی گەلەكەمان بەڕابەرایەتی(ی. ن. ك) پەیوەندی بە شۆڕشەوە دكاتەوەو رۆژی 19/7/1976 لەگەڵ هەڤاڵ سالار عەزیز یەكەم دەستەی پێشمەرگە لەدۆڵی جافەتی دروستدەكەن و بەمامۆستای شەڕی پارتیزانی دادەنرێت.

ساڵی 1978 وەك كادرو پێشمەرگەو جێگری فەرماندەی هەرێم بەشداری كارەساتی هەكاری كردووە، پاشان لەبەر لێهاتووی و قارەمانێتی دەبێتە فەرماندەی هەرێمی چوار.

سەد مەخابن پاش نزیكەی پێنج ساڵ پێشمەرگایەتی لەشۆڕشی نوێی گەلەكەمان لەگەڵ چەند پێشمەرگەیەكی قارەماندا رۆژی 20/8/1981 دەگاتە كاروانی نەمران و دوای راپەڕین تەرمەكەی لەگوندی مالومەوە دەهێنرێتەو سلێمانی و لەگردی سەیوان جارێكی تر بەخاك دەسپێردرێتەوە.

لەم یادە پڕ سوێیدا هیچمان پێناوترێت لەوە زیاتر بڵێین هەزاران سڵاو لەگیانی پاكی شەهید جەمالی عەلی باپیری وەرزشكارو پێشمەرگە، گۆڕەكەت پڕ لەنور بێت.

شەهید سەید مورسەل
شەهید سەید مورسەل پێشمەرگەی مەفرەزە سەرەتاییەکانی یەکێتی و باشترین و دیارترین یاریزانی تۆپی پێی یانەی هەولێر بووە، ئەو بە کۆڵی خۆی ئامێرەکانی ئێزگەی شۆرشی نوێی لە سوریاوە گەیاندە کوردستان.

شەهید مورسەل لەبواری وەرزشی کورستان و شاری هەولێردا یەکێک بوە لە باشترین یاریزانەکانی کوردستان و هەولێر، ئەو بۆ یانەی هەولێر چەندین نازناوی گەورەی بەدەستهێناوە، شەهید مورسەل لە زۆر یانەی تری شاری هەولێر یاری کردوە بەتایبەتی لە هەردوو یانەی(بروسک و هێرش).

شەهید مورسەل لەسەرەتای ساڵی 1972 تێکەل بەکاری سیاسی و کاری رێکخراوەیی بووە، بەتایبەتی لە رێکخستنەکانی(کۆمەڵەی مارکسی لینینی)، دواتر لەساڵی 1976خۆی گەیاندە هەڤالانی سەرکردایەتی لە سوریاو بوو بە یەکێک لە پێشمەرگە سەرەتاکانی شۆرشی نوێ گەلەکەمان.

سەید مورسەل کوڕی سیدحوسێن مورسەل گردعازەبانییەو برای خاڵە سەید مجیدی گردعازەبانییە، ئەم خانەوادەیە لەگەل درووستبوونی باڵی م.س، بەردەوام لەگەڵ جەنابی مام جەلال بوون، خانەوادەی سەیدەکانی گرد عازەبان رۆڵ وپێگەیان لە شۆرشی نوێ گەلەکەمان دیارو بەرچاو بووە و تاوەکو ئێستا (17) شەهیدی سەنگەریان بەخشیوە بە کوردو کوردستان.

شەهید مورسەڵ ساڵی 1946 لە گوندی گردعازەبان لەدایک بووە، خوێندنی سەرەتای و ناوەندی و ئامادەیی لەهەولێر تەواو دەکات، ساڵی 1971 تا 1975فەرمانبەر بووە لە دائیرەی (مەسڵەحەی نەقل رکاب) لە هەولێر، ساڵی 1976 پەیوەندی بە هەڤالانی سەرکردایەتییەوە لە سوریا دەکات، ساڵی 1976 لە سوریا بەشداریی خولێکی سەربازی دەکات، یەکەم پێشمەرگە بووە لە سوریاوە ئامێرەکانی ئێزگەی شۆرشی نوێی بەکۆل گەیاندۆتەوە کوردستان.

(17) هەمین شەهیدی سەنگەری خانەوادەکەیانە، زۆر بەداخەوە رۆژی 3/2/1978 لەسنوری گوندی سماقە شەهید دەبێت و دەگاتە کاروانی نەمرانی (ی.ن.ک).

ئەمانەش ببینە

زۆرترین خوێنراو