پزیشكه‌كه‌ و دوو كارمه‌نده‌ ته‌ندروستییه‌كه‌ سزادران

پزیشكه‌كه‌

دوای ئه‌وه‌ی له‌ نه‌خۆشخانه‌ی شێره‌ی نه‌قیبی تایبه‌ت به‌مناڵبوون له‌شاری كه‌لار پزیشكێكی بێهۆشكه‌ر له‌گه‌ڵ دوو كارمه‌ندی ته‌ندروستی بوو به‌شه‌ڕیان و دواتر برینداربوونی پزیشكه‌كه‌ی لێكه‌وته‌وه‌، ئه‌مڕۆ 19/5 له‌لایه‌ن ئه‌و لیژنه‌یه‌ی كه‌ له‌نه‌خۆشخانه‌كه‌ بۆ زانینی راستییه‌كانی ئه‌و كێشه‌یه‌ پێكهێنرابوو، پزیشكه‌كه‌ و دوو كارمه‌نده‌كه‌ سزای كارگێڕی دران.

له‌ روونكردنه‌وه‌یه‌كیدا كه‌ دكتۆر محه‌مه‌د ئازاد عه‌لی به‌رِێوه‌به‌ری نه‌خۆشخانه‌ی شه‌هید شێره‌ی نه‌قیب بۆ ژنان و مناڵبوون له‌كه‌لار كه‌ وێنه‌یه‌كی بۆ PUKmedia ناردووه‌، هاتووه‌:

پاش ئه‌وه‌ی رۆژی پێنجشه‌ممه‌، 16/5/2013، پزیشكێك و دوو كارمه‌ندی ته‌ندروستی له‌ناو نه‌خۆشخانه‌كه‌ماندا به‌شه‌رِهاتن، لیژنه‌یه‌كی تایبه‌تمان پێكهێنا به‌مه‌به‌ستی به‌دواداچون و لێپێچینه‌وه‌ له‌باره‌ی ئه‌و رووداوه‌، پاش به‌دواداچون بۆمان ده‌ركه‌وت كه‌ ئه‌و سێ فه‌رمانبه‌ره‌ له‌سه‌ر مه‌سه‌له‌یه‌كی تایبه‌تی ده‌ره‌وه‌ی نه‌خۆشخانه‌كه‌مان كێشه‌یان له‌نێواندا دروستبووه‌ و به‌بێ ره‌چاوكردنی ئیتیك و بنه‌ما كارگێرِییه‌كان، هه‌ڵسوكه‌وتیان كردووه‌.

ده‌شڵێت: هه‌ربۆیه‌ ئێمه‌ش به‌پێی ده‌سه‌ڵاتی پێدراومان هه‌ستاین به‌ سزادانیان له‌ڕووی كارگێرِییه‌وه‌و هه‌روه‌ها ئاراسته‌كردنی دۆسیه‌كه‌ بۆ به‌رِێوه‌به‌رایه‌تی گشتی به‌مه‌به‌ستی گرتنه‌به‌ری رێكاری دیكه‌ی كارگێرِیی له‌وباره‌وه‌.

له‌به‌شێكی تری روونكردنه‌وه‌كه‌دا هاتووه‌: هاوكات جه‌ختده‌كه‌ینه‌وه‌ كه‌ ئه‌گه‌رچی ئه‌و رووداوه‌ نه‌بوه‌ته‌ هۆی وه‌ستانی كاری هیچ به‌شێكی نه‌خۆشخانه‌كه‌، به‌ڵام رووداوێكی نه‌خوازراوه‌و مایه‌ی قبوڵكردن نییه‌ له‌ هیچ فه‌رمانبه‌رێك به‌رژه‌وه‌ندی گشتی له‌به‌ر كێشه‌ی تایبه‌تی پێشێل بكات.

PUKmedia سامان یاروه‌یس