باشتربوونی تەندروستی سەرۆك مام جەلال لە راگەیاندنەكانی ئێراندا

مام جەلال ناسنامەی خەڵكی كوردستانەو رابەری تاقانانەی كوردە

لە كاتی بڵاوبوونەوەی وێنە نوێكانی سەرۆك مام جەلال‌، راگەیاندنەكانی ئێران بە گرنگییەوە ئەم هەواڵەیان گواستووەتەوە.

ماڵپەڕی بولتەن ‌نیوز لە هەواڵێكدا بە ناونیشانی "هەواڵی تەندروستی تاڵەبانی، خەڵكی عیراقی هێنایە سەرشەقامەكان" نوسیویەتی: دوای بڵاوبوونەوەی وێنەكانی جەلال تاڵەبانی خەڵكی شارەكانی عیراق هاتنە سەرشەقام‌و خۆشحاڵی خۆیان بۆ تەندروستی تاڵەبانی دەربڕی".

لە درێژەی هەواڵەكەدا، هاتووە: لە عیراقدا هەركات قەیرانێك روویداوە بەبوونی تاڵەبانی، قەیران چارەسەركراوە، بڵاوبوونەوەی ئەم وێنانە هەموو لایەكی خۆشحاڵ كرد".

هەروەها ئاژانسەكانی هەواڵی خبرێ‌ نلاین، رجانیوز، ایسنا، فارس ‌نیوز، فرارو، عصرایران‌و،  چەندین ماڵپەڕو ئاژانسی هەواڵی ئێرانی بە بڵاوكردنەوەی وێنە نوێكانی سەرۆك مام جەلال وێڕای ئاماژە بە كورتەیەك لە ژیانی مام جەلال، باسیان لە گرنگی رۆڵی مام جەلال لە ئاشتی‌و سەقامگیری عیراق‌و كوردستان كردووە‌و رایانگەیاندووە: بڵاوبوونەوەی ئەم وێنانە دوای پێنج مانگ لە نەخۆشكەوتنی جەنابیان، خەڵكی هێنایە سەر شەقام‌و بەم بۆنەیەوە خەڵك جەژن‌و شادییان گێڕا، كە ئەمە نیشانەی خۆشەویستی مام جەلال-ە لای خەڵكەكەی‌و لە هەمان كاتدا نیشانەی گرنگی‌و بێوێنەیی رۆڵی جەنابیانە لە ئارامی‌و سەقامگیری‌و پێشكەوتنی وڵاتەكەیدا.

هەروەها زۆربەی رۆژنامەكانی ئێران لەوانە شرق، بهار، قانون، تەران امروزو ..هتد، بە گرنگییەوە ئەم هەواڵەیان باسكردووەو بۆ نمونە رۆژنامەی قانون لەژێر مانشێتی "مام جەلال كوردەكانی شاد كردەوە" باسی ژیان‌و كەسایەتی مام جەلال-ی كردووەو رایگەیاندووە: بڵاوبوونەوەی ئەم وێنانە ئۆمێدێكی زۆری لای خەڵكی كوردستان‌و عیراق بۆ گەڕانەوەی تاڵەبانی، دروست كردووە.

لای خۆشیەوە، د.سادق زیباكەلام مامۆستای زانستە سیاسییەكانی زانكۆی تاران‌و توێژەری بواری سیاسەت، سەبارت بە هۆكاری رەنگدانەوەی گرنگی هەواڵی تەندروستی سەرۆك مام جەلال لەناو خەڵك‌و لە راگەیاندنەكانی ئێراندا بە PUKmedia ی راگەیاند: جێگەو پێگەی جەلال تاڵەبانی جگە لە كەسایەتی خۆی‌و رۆڵ‌و دەستكەوتەكانی لە سەردەمی پێش رووخانی دیكتاتۆری لە عیراق‌و هەروەها پاش رووخانی سەدام، هەڵگری یەك تایبەتمەندی گرنگە ئەویش ئەوەیە كە نەخۆشكەوتنی جەنابیان لە كاتێكدا روویدا كە عیراق لە رووی ئاسایش‌و دژایەتییە ناوخۆییەكاندا، لە یەكێك لە خراپترین قۆناغەكانی خۆیدایە، لە وەها بارودۆخێكیشدا گرنگی بوونی جەنابی مام جەلال لە هەموو كاتێكی دیكە خۆی زیاتر نیشان دەدات‌و هەموو عیراق‌و كوردستان زیاتر پێویستیان پێیەتی.

وتیشی: ئەوە ئۆمێدو هیوایەی خەڵكی عیراق بە مام جەلال‌ یان هەیە وەكو سەرۆك كۆماری عیراقی فیدراڵی كە كلیلی چارەسەری كێشەكانە، وابیریش دەكەمەوە كە خۆشحاڵی‌و پێشوازی خەڵك‌و لایەنەكان بۆ گەڕانەوەی تەندروستی جەنابیان، بۆ ئەوە دەگەڕێتەوە كە جارێكی دیكە بەبوونی مام جەلال‌و تواناو كاریگەری جەنابیان، ئاسایش‌و یەكێتی‌و ئاشتی لە وڵاتەكەیاندا روو لە گەشە بكات.

لای خۆشیەوە، ئەردەشیر پەشەنگ نوسەرو شارەزا لەكاروباری رۆژهەڵاتی ناوەڕاست بۆ PUKmedia وتی: بەڕای من یەكێك لە هۆكارەكانی ئەم شادی دەربڕین‌و پێشوازیكردنە بۆ هەواڵی تەندروستی مام جەلال، دەگەڕێتەوە بۆ جێگەو پێگەو رۆڵی بێوێنەی مێژوویی ئەم رابەرە كوردە كە نەك تەنها لای كوردەكان، بەڵكو لای خەڵكی عیراق‌و ناوچەكە هەیەتی.

راشیگەیاند: ناتوانین بیشارینەوە كە مام جەلال ناسنامەی خەڵكی كوردستانەو یەكێكە لەو رابەرە تاقانانەی كورد كە لە كۆمەڵگای نێودەوڵەتیدا، كوردستان بەوەوە دەناسرێت.

PUKmedia بەشی هەواڵی نوسینگەی تاران