هه‌ورامی و سه‌رهه‌ڵدانی ره‌خنه‌ی ئه‌ده‌بی

"ره‌خنه‌ی ئه‌ده‌بی كوردی له‌ شیعره‌وه‌ ده‌ستپێده‌كات"

رۆژی 17-5 له‌ هۆڵی شه‌هید مه‌هدی خۆشناو به‌ سه‌رپه‌رشتی یه‌كێتی نووسه‌رانی كورد/ لقی هه‌ولێر، كۆڕێك بۆ مامۆستا حه‌مه‌ كه‌ریم هه‌ورامی به‌ ناونیشانی (سه‌رهه‌ڵدانی ره‌خنه‌ی ئه‌ده‌بی) سازكرا.

سه‌باره‌ت به‌ كۆڕه‌كه‌، هه‌ورامی رایگه‌یاند: ره‌خنه‌ی ئه‌ده‌بی كوردی له‌ شیعره‌وه‌ ده‌ستپێده‌كات، هه‌روه‌ك له‌ رێگای شیعره‌وه‌ توانراوه‌ زمان بپارێزرێت و بڵاوببێته‌وه‌ به‌ تایبه‌تی دوای ئه‌وه‌ی شاعیرانی كورد وازیان له‌ نووسینی شیعری عه‌ره‌بی و فارسی و توركی هێنا، له‌به‌رئه‌وه‌ی شیعری شیاو و نه‌شیاو هه‌بوون، بۆیه‌ ره‌خنه‌ هاته‌ مه‌یدانه‌وه‌.

هه‌ورامی، شاعیری كورد مه‌وله‌وی به‌ تاكه‌كه‌س داده‌نێت له‌ نووسینی ره‌خنه‌ی ئه‌ده‌بی كوردی، نموونه‌شی هێنایه‌وه‌و وتی: له‌ سه‌رده‌می مه‌وله‌وی-دا خانی قوبادی به‌ شیعرێك ناسراو بوو، شاعیر (مه‌حروم) میرزا عه‌بدوڵڵا شیعرێكی ره‌وانه‌ی لای مه‌وله‌وی ده‌كات و ده‌ڵێت: شیعره‌كه‌م له‌گه‌ڵ شیعره‌كه‌ی خانی قوبادی به‌راورد بكه‌، مه‌وله‌وی دوای خوێندنه‌وه‌ی هه‌ردوو شیعری (قوبادی و مه‌حروم) و دوای هه‌ڵسه‌نگاندنی هه‌ردوو شیعره‌كه‌، شیعری (مه‌حروم) به‌ باشتر وه‌سفده‌كات، له‌وڕووه‌وه‌ هه‌ورامی ده‌ڵێت: ئه‌وه‌ یه‌كه‌م به‌ڵگه‌یه‌ مه‌وله‌وی به‌ نووسین له‌ رێگه‌ی شیعره‌وه‌ ره‌خنه‌و هه‌ڵسه‌نگاندن ده‌كات.

وتیشی: شاعیران ئه‌حمه‌دی خانی و نالی و حاجی قادری كۆیی له‌ شیعره‌كانیاندا ره‌خنه‌یان گرتووه‌، به‌ڵام وه‌ك ئه‌وه‌ی مه‌وله‌وی نییه‌ كه‌ له‌ ره‌خنه‌و هه‌ڵسه‌نگاندن له‌ نێوان دوو شیعردا بكات.

له‌ كۆتایی كۆڕه‌كه‌داو له‌ نێوان ئاماده‌بوواندا هه‌ڵسه‌نگاندنی جۆراوجۆر بۆ بابه‌ته‌كه‌ی مامۆستا حه‌مه‌ كه‌ریم هه‌ورامی كرا.

* حه‌مه‌ كه‌ریم هه‌ورامی له‌ ساڵی 1935 دا له‌ گوندی گڵۆپ-ی ناوچه‌ی هه‌ورامان له‌دایكبووه‌، له‌ خوێندندا مه‌لایه‌تی و زانكۆی ئه‌زهه‌ری ته‌واوكردووه‌، هه‌روه‌ها نووسینیشی له‌ بواره‌كانی (په‌روه‌رده‌و منداڵ و لێكۆڵینه‌وه‌و فه‌لسه‌فه‌و چیرۆك و رۆمان) هه‌یه‌و تائێستاش به‌رده‌وامه‌.

PUKmedia سه‌باح شوكر - هه‌ولێر