جەلیلی: دانوستاندنەكانی ئەستەنبوڵ بەسوود بوون

سەعیدی جەلیلی

سەعید جەلیلی ئەمینداری ئەنجومەنی باڵای ئاسایشی نەتەوەیی و گەورە دانوستانكاری بەرنامە ئەتۆمییەكەی ئێران لە بارەگای كۆنسوڵگەری ئێران لە ئەستەنبول، لە كۆنفرانسێكی رۆژنامەوانیدا سەبارەت بە كۆبوونەوەكەی نێوان خۆی و كاسرین ئەشتۆن رێكخەری كاروباری سیاسەتی دەرەوەی ئەوروپا رایگەیاند: دانیشتنە 4 سەعاتییەكەی لەگەڵ ئاشتۆن بەسوود بووە و هیواشی خواست كە سوود لە دەرفەتەكان وەربگیرێت، ئەگینا كات لە دەستدەچێت و هیچ شتێك چارەسەر نابێت.

جەلیلی سەبارەت بە پێشنیارەكەی ئێران كە رادەستی یەكێتی ئەوروپا كراوە، وتی: لە گفتوگۆ و دانوستانەكانی ئەم دواییەدا پڕۆژەیەكی تێروتەسەلمان لە شاری ئەلماتی كازاخستان خستەبەردەست كۆمەڵەی وڵاتانی 1+5 بەمەبەستی چارەسەركردنی بەرنامە ئەتۆمییەكە، هەروەك بڕیاربوو ئەوان بگەڕێنەوە بۆ وڵاتەكانی خۆیان بۆ گفتوگۆكردنی زیاتر و پاشان كاسرین ئاشتۆن راوبۆچوونی خۆی بە من رابگەیەنێت، بەڵام پاش تێپەڕبوونی 40 رۆژ، ئاشتۆن ئامادەیی خۆی بۆ گفتوگۆكردن دەربڕی.

ئەمینداری ئەنجومەنی باڵای ئاسایشی نەتەوەیی ئێران لە بەشێكی تری قسەكانیدا وتی: وەفدی ئەوروپی لە ئەلماتی كازاخستان پێشنیاری خۆیان خستەڕوو و ئێمەش ئامادەیی خۆمان نیشاندا كە لەماوەی كەمتر لە مانگێكدا وەڵامیان بدەینەوە.

جەلیلی سەبارەت بە گفتوگۆكانی شەوی رابردووی خۆی لەگەڵ رێكخەری كاروباری سیاسەتی دەرەوەی ئەوروپا، وتی: هەروەك خاتوو كاسرین ئەشتۆن باسیكرد دانوستانەكان بەسوود بوون و هیواشی خواست كە دانوستانەكان بەردەوامبن، چونكە هەندێك كات هەل و دەرفەت دەڕەخسێت، ئەگەر لەو هەل و دەرفەتە بە باشی سوود وەرنەگیرێت، ئەوا لەدەستدەچێت.

سوریا تەنها رێگەیەكی لە بەردەمدایە ئەویش دیموكراسییە
جەلیلی سەبارەت بە بارودۆخی سوریا وتی: هەڵوێستی كۆماری ئیسلامی ئێران هەر لە سەرەتاوە روون و ئاشكرابووە، كە ئەویش ئەوەیە ئێمە دژی توندوتیژیین و هەرجۆرە چارەسەرێكی سەربازی رەتدەكەینەوە،  سوریا تەنها یەك رێگەی لە بەردەمدایە، ئەویش دیموكراسییە، كە لەڕێگەی دانوستاندن و هەڵبژاردنەوە ئەنجام دەگرێت و هەمووان دەبێت زەمینەیەك فەراهەم بكەین بۆئەوەی حكومەت و گەلی سوریا خۆیان بۆ گفتوگۆیەكی نیشتمانی ئامادە بكەن و دواتر هەڵبژاردن لەو وڵاتەدا بەڕێوەبچێت.

ئێران هەمیشە ئامادەیە بۆ گفتوگۆكردن
لە بەشێكی تری قسەكانی جەلیلی ئەوەشی خستەڕوو كە ئێران ئامادەیە بۆ گفتوگۆ و دانوستاندن لە هەر كات و شوێنێكدا، چ بەر لە هەڵبژاردنەكانی ئێران، چ دوای هەڵبژاردنەكان، سەبارەت بە ئاسایشی توركیاش وتی: ئێمە ئاسایشی توركیا بە ئاسایشی خۆمان دەزانین و پەیوەندییەكی برایانە و دۆستانەمان لەگەڵ توركیادا هەیەو سنوورەكانی ئێران و توركیا دەبێت هەمیشە سنووری دۆستی و ئاسایشی بێت و نابێت رێگە بدرێت دوژمنان ناوچەكە نائارام بكەن.

سەرچاوە ئاژانسی میهر
و/ جەواد حەیدەری

PUKmedia