شورای دەبەرند بازیان كرایەوە

شواری دەربەند بازیان لەمێژووی كوردا گرنگی خۆی هەیە

ئەمڕۆ 2013/5/9، بە ئامادەبوونی عیماد ئەحمەد جێگری سەرۆكی حكومەتی هەرێمی كوردستان و د . كاوە مەحمود وەزیری رۆشنبیری و پارێزگاری سلێمانی و بەڕێوەبەری گشتی شوێنەوار و ژمارەیەك لە بەرپرسانی حكومی و حزبی و جەماوەری ناوچەكە، لە مەراسیمێكدا شورای دەربەندی بازیان كرایەوە كە یەكێكە لە شوێنەوارە دێرین و مێژووییەكانی میلـلەتەكەمان و بە سێ قوناغ لەلایەن حكومەتی هەرێمەوە بنیادنرا و دروستكرایەوە.

سەرەتای مەراسیمەكە قائیمقامی چەمچەماڵ بە وەكالەت، وتەی بەخێرهاتنی پێشكەشكردو ئاماژەی بەگرنگی شوێنەواری مێژوویی دەربەندی بازیان دا و رایگەیاند: ئەم سنورەرە جگە لە روی مێژووییەوە، دەتوانرێت لە كەرتی گەشتیاریشدا گرنگی پێبدرێت و لەو رووەشەوە هەنگاوی باشمان ناوە.

پاشان بەڕێوەبەری گشتی شوێنەواری هەرێمی كوردستان لە وتەیەكدا باسی لە هەوڵەكانی بەڕێوەبەرایەتییەكەیانی كرد، لە زیندووكردنەوە و نوێكردنەوەی ژمارەیەك شوێنەواری مێژوویی گرنگ لە هەرێمی كوردستان، ئاماژەی بەوەشدا كە بە هەوڵی حكومەتی هەرێم هەنگاوی باشمان ناوە بۆ پاراستنی شوێنەوارەكان و دووبارە بنیادنانەوەیان.

پاشان عیماد ئەحمەد جێگری سەرۆكی حكومەتی هەرێم  لە وتارێكدا ئاماژەی بەگرنگی پاراستن و هێشتنەوەی شوێنەوارە مێژووییەكان داو وتی: حكومەتی هەرێم بەگرنگییەوە لە ئەركی بەڕێوەبەرایەتی شوێنەوار دەڕوانێت و لەگەڵ بەڕێز نێچرڤان بارزانی سەرۆكی حكومەت و ئەنجومەنی وەزیران گفتوگۆمان كردووە بۆئەوەی بەڕێوەبەرایەتی شوێنەوار بكرێتە دەستەو لە پەرلەمانی كوردستان یاسای تایبەت بەدەستەی شوێنەوار لەڕووی قانونییەوە پەسەند بكرێت.

جێگری سەرۆكی حكومەتی هەرێم گرنگی ئەم هەنگاوەی بۆ ئەوە گەڕاندەوە كە شوێنەوار نیشاندەرو سەلمێنەری مێژووی هەر گەل و نەتەوەیەكە و دەتوانرێت لەو رووەوە ئەم سەروەتە گرنگەی كورد لە فەوتان بپارێزرێت و وەك خۆی بهێڵدرێتەوە وەك ناسنامەیەك بۆ مێژووی گەشی كورد.

جێگری سەرۆكی حكومەت وتیشی: شورای دەربەندی بازیان و بەردە قارەمان بەشێكن لەمێژووی پر سەروەری میلـلەتەكەمان و بایەخێكی زۆریان هەیە و هەمیشە شوێنی بەرەنگاربوونەوەو مقاوەمەت بووە دژ بە دوژمنان و جگەلەوەی بەهۆی برینداربوونی مەلیك مەحمود لەكاتی بەرەنگاربوونەوەی هێزی داگیركەردا لەم شوێنەدا بووە سمبولێك بۆ شۆڕشە یەك لە دوای یەكەكانی میلـلەتەكەمان.

عیماد ئەحمەد لە درێژەی وتارەكەیدا ئاماژەی بەوەشكرد كە زیندووكردنەوەی ئەم شوێنەوارانە بۆ نەوەكانی ئەمڕۆمان گرنگی زۆریان هەیە، جگەلەوەی هەقی خۆیانە شانازی بەو رابردووە پڕسەروەرییەی میلـلەتەكەمانەوە بكەن، دەبێت خۆیان بۆ بەرپرسیارێتی قۆناغی داهاتوو ئامادەبكەن و مێژووی پڕلە سەروەری رابردوو لەگەڵ دەستكەوتەكانی ئەمڕۆ بكەنە سەرەتای هەنگاوێكی گرنگ بۆ مسۆگەركردنی ئایندەیەكی گەش بۆ میلـلەتەكەمان.

جێگری سەرۆكی حكومەت تەئكیدیشیكردەوە كە هێشتا قۆناغەكانی خەبات بەردەوامییان هەیە و خەباتی گرنگی ئەمڕۆمان لە ناوخۆدایە و شۆڕشە بۆ چاكسازی و دژایەتی گەندەڵی و درێژەدان بە كاروانی ئاوەدانی و خزمەتكردنی میلـلەتەكان، بەردەوامین لە خەبات بۆ بەدەستهێنانی ئەو مافانەی هێشتا بەدەست نەهاتوون و گەڕانەوەی ناوچانەكانی دەرەوەی هەرێم.

لە كۆتایی وتارەكەشیدا جێگری سەرۆكی سوپاسی بەڕێوەبەرایەتی گشتی ئاسەواری هەرێم و سلێمانی و هەموو ئەو دڵسۆزانەشی كرد كە رۆڵیان هەبووە لە سەرخستنی ئەم پڕۆژە گرنگە مێژوییە و دڵنیاشیكردنەوە كە حكومەتی هەرێم بەردەوام پشتیوانیان دەبێت لە زیندووكردنەوە و نوێكردنەوەی سەرجەم شوێنەوارەكانی هەرێمی كوردستان كە رۆڵی گرنگی هەیە لە بەزیندوویی هێشتنەوەی مێژووی میلـلەتەكەمان و برەودان بە كەرتی گەشتیاریش لە هەرێمی كوردستان.



PUKmedia هەردی ئەبوبەكر - بازیان