باخچەكانی كەركوك وشك دەبن

هیچ باخچەیەك بەشێوەیەكی زانستی دروستنەكراوە

بەهۆی خزمەتنەكردنیان‌و خراپی ئەو جێگایانەی باخچەی تێدا دروستكراوە، بەشێكی زۆر لەباخچەكانی كەركوك وشكیان كردووەو، لێپرسراوی ئۆفیسی كەركوكی كۆمەڵەی كوردستانێكی سەوزیش، رایدەگەیەنێت: "باخچەكانی كەركوك بەشێوەیەكی زانستی دروستنەكراوە".

شكۆفە محەمەد لێپرسراوی ئۆفیسی كەركوكی كۆمەڵەی كوردستانێكی سەوز بە PUKmedia ی راگەیاند: دەركەوتووە بەشێكی زۆر لەباخچەكانی كەركوك‌و ئەو نامامانەی لەسەر رێگەی كەركوك - هەولێرو كەركوك - سلێمانی روێندراوە، وشكیان كردووە.

وتیشی: بەشێكی زۆر لەوباخچانە بەشێوەیەكی زانستی دروستنەكراوە.

راشیگەیاند: هۆكاری وشك بوونی ئەو باخچەو نەمانە دەگەڕێتەوە بۆ ئەوەی ئەو نەمانانە لەو جێگایانە روێندراوە جێگایەكی شیاو نییە بۆ روواندنی نەمام‌و هەروەها كەمی ئاو كارگەری دروستكردووە.

روونیشیكردەوە: بۆمان دەركەوتووە بەشێكی زۆر لەو جێگایانەی شارەوانی باخچەی تێدا دروستكردووە یان نەمامی تێدا رواندووە، ئاو ژێر زەوی لەو جێگایانە كەمە.

PUKmedia هەردی ئەبوبەكر - چەمچەماڵ