riklam

تیمێكی فه‌ره‌نسی چه‌ندین شوێنه‌وار له‌ به‌كره‌جۆ ده‌دۆزنه‌وه‌

شوێنەوار‌‌ 03:09 PM - 2016-10-18
.

.

له‌ گردی كوناره‌ی نزیك گوندی عه‌زیزی ناوچه‌ی به‌كره‌جۆی شاری سلێمانی، كۆتایی به‌ وه‌زری كنه‌و پشكنینی ئه‌مساڵی تیمی شوێنه‌واری زانكۆی پاریس هات كه‌ به‌ سه‌رۆكایه‌تی د.ئه‌لین پسپۆڕی بواره‌كه‌ به‌ڕێوه‌چوو.

بۆ زانیاری له‌ باره‌ی به‌ڕێوه‌چوونی كاره‌كانی ئه‌و وه‌رزه‌، په‌روین یاوه‌ر مه‌نده‌ شوێنه‌وارناسی پێشكه‌وتوو كه‌ یاوه‌ری تیمه‌كه‌ ده‌كات تایبه‌ت به‌ PUKmedia ی راگه‌یاند: له‌گه‌ڵ ئه‌و تیمه‌ ماوه‌ی چوار ساڵ كارده‌كه‌ین، پێش ده‌ستكردنمان به‌ كاره‌كانیش تیمه‌كه‌ رووپێویان بۆ شوێنه‌كه‌ كردبوو و زانیاریان وه‌رگرتبوو، ئاماده‌كاریان كردبوو تا به‌ وردی كاروباره‌كان جێبه‌جێ بكه‌ن بۆ ئه‌وه‌ی بتوانن زۆرترین زانیاری له‌سه‌ر دۆزراوه‌كان وه‌ربگرن.

وتیشی: ئه‌و شتانه‌ی تیمه‌كه‌ دۆزیانه‌وه‌ بریتین له‌ گۆزه‌، گۆڕ، ئێسك، ته‌نانه‌ت ته‌رمێكی تێدا بوو كه‌ شمشێرێكی له‌ده‌ستدا بوو، كه‌لوپه‌لی جوانكاری ئافره‌تان، كه‌ سه‌رجه‌میان مێژووه‌كه‌ی ده‌گه‌ڕێته‌وه‌ بۆ 3500 ساڵ پێش زایین، واتا نێوان سه‌رده‌می برۆنزی و ئه‌كه‌دییه‌كان. هه‌روه‌ها ئێسكه‌كان به‌شێكیان بردوونه‌ته‌وه‌ بۆ وڵاتی خۆیان به‌ مه‌به‌ستی پشكنین و وه‌رگرتنی زانیاری زیاتر له‌سه‌ریان. ئه‌مه‌ جگه‌ له‌وه‌ی ژماره‌یه‌كی زۆر تابلۆو نووسراویش دۆزراونه‌ته‌وه‌، به‌ڵام به‌داخه‌وه‌ هه‌ندێكیان زۆر كۆن بوون و رزیون ناتوانرێت زانیاری له‌سه‌ر نووسینه‌كانی یان وێنه‌كانیان وه‌ربگیرێت.

راشیگه‌یاند: جگه‌ له‌ كه‌لوپه‌له‌كان كه‌ دۆزراونه‌ته‌وه‌، شوێنه‌وارێكیشمان دۆزیوه‌ته‌وه‌ كه‌ قه‌ڵایه‌كه‌، به‌پێی زانیارییه‌كان شوێنی پاشا یان كه‌سایه‌تییه‌كی ناسراوی ئه‌و سه‌رده‌مه‌ بووه‌، چونكه‌ شوێنه‌واره‌كه‌ گه‌وره‌یه‌و له‌ چه‌ند به‌شێك پێكهاتووه‌.

سه‌باره‌ت به‌وه‌ی ئه‌و تیمه‌ چۆن كاره‌كانیان ده‌كه‌ن؟ ئه‌و شوێنه‌وارناسه‌ ئاماژه‌ی به‌وه‌ كرد، تیمه‌ فه‌ره‌نسیه‌كه‌ پێشتر گرێبه‌ستیان له‌گه‌ڵ كردووین و له‌ چه‌ند شاره‌زایه‌ك پێكهاتوون كه‌ كچ و كوڕیشیان تێدایه‌، هه‌ر ساڵه‌و ژماره‌یه‌كیان دێنه‌ ئێره‌و كاره‌كان به‌ڕێوه‌ده‌به‌ن. دوای وه‌رگرتنی زانیاری ته‌واو له‌سه‌ر دۆزراوه‌كان، پێشكه‌شی به‌ڕێوه‌به‌رایه‌تی شوێنه‌وارناسی سلێمانی ده‌كه‌ن و له‌وێ ده‌پارێزرێت.

راشیگه‌یاند: ساڵی داهاتووش تیمێكی تر دێنه‌وه‌ هه‌مان شوێن بۆ دۆزینه‌وه‌ی به‌شی ترو زانیاری زیاتر له‌سه‌ر دۆزراوه‌كان، كه‌ ئه‌وان وه‌كو پرۆژه‌یه‌كی تایبه‌ت به‌ خۆیان سوودی لێ وه‌رده‌گرن.

PUKmedia  لانه‌ كاشان

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket