هەرێم کاردەكات بۆ هاوتاکردنی مووچەی زیندانیانی سیاسی لەگەڵ بەغداد

وەزارەتی دارایی هەرێم

دیمەنێکی کۆبونەوەکە

لەکۆبونەوەیەکدا دواین هەوڵەکان بۆ دەستپێکردنی ڕێکارەکانی هاوتاکردنی مووچەی زیندانیانی سیاسی و ڕاگیراوانی سیاسی هەرێم لەگەڵ حکومەتی فیدراڵ باسی لێوەدەکرێت.

وەزارەتی دارایی و ئابوری هەرێم رایگەیادووە: ئەمڕۆ سێشەممە ( ٩ ی حوزەیرانی ٢٠٢٦ ) ئاوات شێخ جەناب وەزیری دارایی و ئابووری بەئامادەبوونی عەبدوڵای حاجی مەحمود وەزیری شەهیدان و کاروباری ئەنفالکراوان و دکتۆر ئامانج ڕەحیم سکرتێری ئەنجومەنی وەزیران و دکتۆر عەبدولحەکیم خەسرۆ سەرۆکی فەرمانگەی هەماهەنگی و بەدواداچوون ، لە دیوانی وەزارەتی دارایی و ئابووری سەرپەرشتی کۆبوونەوەیەکی كرد كە تایبەت بوو بە ڕێکارەکانی هاوتاکردنی مووچەی زیندانیانی سیاسی و ڕاگیراوانی سیاسی لەگەڵ حکومەتی فیدراڵ .

لەکۆبوونەوەکەدا تیشک خرایە سەر دواین هەوڵەکان بەمەبەستی هاوتاکردنی مووچە و ئیمتیازات و شایستەی دارایی زیندانیانی سیاسی و ڕاگیراوانی سیاسی هەرێمی کوردستان لەگەڵ هاوتاکانیان لە عیراق لەسەر بنەمای جێبەجێکردنی بڕیاری ئەنجومەنی وەزیرانی هەرێمی کوردستان کە لەمانگی ئازاری ئەمساڵ دەرچووە، ئەوەش دوای کۆبوونەوە و لێکتێگەیشتنی هاوبەشی نێوان وەزارەتی شەهیدان و ئەنفالکراوان و دەزگای زیندانییانی سیاسی عیراق هاتووەتە ئاراوە.

لە کۆبوونەوەکەدا بڕیاردرا لە ئایندەیەکی نزیکدا وەفدێکی حکومەتی هەرێمی کوردستان بەسەرۆکایەتی وەزیری شەهیدان و ئەنفالکراوان بەمەبەستی گفتوگۆ و گرتنەبەری ڕێکارەکان بۆ هاوتاکردنی مووچە و ئیمتیازات و شایستە داراییەکانی زیندانییانی سیاسی هەرێمی کوردستان لەگەڵ هاوتاکانیان لە عیراق و دابینکردنی شایستەی دارایی بۆیان سەردانی شاری بەغداد بکات.

PUKMEDIA