ئەحمەد میرە: میدیا سیخوڕەکان هەوڵی ناشرینکردنی سلێمانی دەدەن

پەیجی ئەحمەد میرە

د. ئەحمەد میرە مامۆستای زانکۆ

مامۆستایەکی زانکۆ ئەو میدیایەنەی بە مەبەست هەوڵی ناشرینکردنی سلێمانی دەدەن، بە میدیای سیخوڕ ناویان دەبات و دەشڵێت:" ئەگەر سەرۆکوەزیران نیشتمانییانە بیری بکردایەوە، دەبوو سزای ئەو میدیا سیخوڕانە بدات".


د. ئەحمەد میرە مامۆستای زانکۆ و رۆژنامەنوس لە بارەی ئەو هێرشە ناڕەوایانەی لەلایەن بەشێک لە کەناڵەکانی پارتییەوە دەکرێتە سەر سلێمانی رایگەیاند: پێویستە پرسە سیاسییەکان لەگەڵ بارودۆخی شارەکان بەتایبەت سلێمانی جیا بکەینەوە و چونکە هەموومان هەست بەوە دەکەین کە ماوەیەکی زۆرە شەپۆلێکی میدیایی ناڕەوا دژی سلێمانی هەیە و پرسە سیاسی و کۆمەڵایەتی و تەنانەت فەرهەنگی و خزمەتگوزارییەکانیشی لە شاری سلێمانی کردووەتە ئامانج بۆ ئەمەش لەلایەن هەندێک میدیای پارتییەوە پارەیەکی خەیاڵی خەرجدەکرێت.

ئەو مامۆستایەی زانکۆ ئاماژەی بەوەشکرد: کە باسی خراپی سیاسەتی پارتی دەکرێت، ناکرێت خەڵکی هەولێری خۆشەویست بشکێنین، چونکە ئەو هێرشە ناڕەوایەی کە لە چەند رۆژی رابردوودا لەسەر رووداوەکەی کۆرمۆر کرایە سەر سلێمانی، بە ئەندازەی هێرشە تیرۆرستییەکەی سەر کۆرمۆر تیرۆرکردنی سلێمانی بوو.

د. ئەحمەد میرە دووپاتیشی کردەوە: هەرچەندە ئەو کەناڵانەی بەو شێوازە کاردەکەن، من بە کەناڵ و میدیایان نازانم و لەژێر پەردەی دەزگایەکی سیخوڕی کار بۆ هەڵگیرساندنی شەڕی ناوخۆ و جێبەجێکردنی ئەجێندای ئیرهابی دەکەن، بۆیە هەمیشە هەوڵی دروستکردنی رۆشنبیری ساختە دەدەن و لەڕێگایەنەوە پەلاماری سلێمانی دەدەن، بەڵام ئەگەر سەرۆکوەزیرانی هەرێمی کوردستان نیشتمانییانە بیر بکاتە، دەبوو سزای ئەو کەناڵە نامۆڕاڵانەی بدایە و دەرسیان دابدات.

راشیگەیاند:  هەندێک میدیای سیخوڕی لە هەولێر هەن، کە بەهەموو شێوەیەک هەوڵی ناشرینکردنی سلێمانی دەدەن و لە سیاسەت و سەوزایی و شیعر و شانۆ روشنبیری  شارەکە دەخوێنن، بۆیە گرنگە پێش هەموو کەس پارتییەکانی سلێمانی ئەوە قبوڵ نەکەن، ئەو میدیا سیخوڕانە بشکێنن و رێگا راستەکەیان نیشان بدەن.

PUKMEDIA