رووی (سیا)ی میدیای چەواشە لە دۆسیەی كۆرمۆردا

PUKMEDIA

ڕێبوار ستار

ڕێبوار ستار

سروشتی میدیای رەسەن و كاریگەر لەوەدایە كە دەتوانێت ئەرکە میدییایی و پیشەییەكانی خۆی بەشێوازی هەستکردن بە بەرپرسیارێتی نیشتمانیی و ئەخلاقی و لە چوارچێوەی پاراستنی یاساکانی کاری رۆژنامەگەری و گەیاندنی هەواڵ و زانیارییەکان كاربكات و متمانەی كۆمەڵگا و وەرگرانی بەدەست بێنێت، لەكاتێكدا میدیای زەرد و سكانداڵ ئەو سەرچاوانە دەكات بە ئامرازێك لەپێناو بەرژەوەندیە تایبەتیەکاندا و لە رێگەی بەجێگەیاندنی رۆڵێكی نا بەرپرسار شیرازەی كۆمەڵایەتی و سیاسی كۆمەڵگا تێكدەدات و هۆكارێك دەبێت بۆ سەر لێ شێواندن و بەلاڕێدابردنی کۆمەڵگە.

روداوەكانی كۆڕمۆر كە روونە كێ سوودی لێوەردەگرێت و دەیكاتە كارتێكی سوتاوی میدیایی و سیاسی بۆ پەلاماردانی ئەوانی دیكە، دەبوو بۆ ئەو میدیا نزیك لە پارتیانە ببووایە سەرچاوەی وانەیەكی ئەخلاقی، كە نیشتمان و تەونی كۆمەڵایەتی و بەها باڵاكان گەورەترن لەو نیەت و ئامانجە چەپەڵانەی مێردمناڵێك لە پشت ماكینەیەكی گەورەی میدیاییەوە بە خەڵكی بكات، چونكە بنەڕەتی ئاكاریانەی روماڵی سەنگین لەوەدا بەرجەستە دەبێت كە پێویستە میدیا پێش رەوتی لێكۆڵێنەوەكان نەكەوێت و لە بری دادگا و لیژنە تایبەتمەندەكان بڕیار نەدات، ئەمە ئەو پێوانە پیشەیی و ئەخلاقیەیە كە میدیاكانی پارتی نەیانتوانی پێوەی پابەند بن و رووی راستەقینەی خۆیان پێشكەش بە هەمووان كرد.

ئەو بەدكارییە میدیاییەی چەند رۆژێكە دەكرێتە سەر یەكێتی، هەڵەی تەكنیكی میدیاكارێكی كەم ئەزموونی ناو میدیایەكی پارتی نیە، بەڵكو ستراتیژی دڵڕەقانەی ئەو خاوەنانەیە كە سپۆنسەر كەناڵی بە پارە دزراوی ئەو وڵاتە دەیانەوێت شەڕی چەواشەكاریی لەبەرامبەر یەكێتی بكەن، شینەكەش وەك هەمیشە بۆ حسێن نیە، بەڵكو بۆ ئەو خەمە قوڵەیە كە بە هێزی یەكێتیی نیشتمانیی كوردستان و سەرۆكەكەی نەیانتوانی غازیش بەدەردی نەوت ببەن و بیخەنە دۆخی تاڵانیەوە. چونكە خاوەنی ئەو كەناڵانە لەوەتەی هەن هەر بەو لۆژیكە فێركراون، ئەگەر شتێك بۆ ئەوان نەبێت تێكیدەدەن و لەناوی دەبەن و وێرانی دەكەن، ئەزموونیش ئەو قسەی سەلماندووە.

بەدكاری میدیاكانی پارتی لەوەدا خۆی بەرجەستە دەكات كە لە دوێنێوە كەوتوونەتە بەر شەپۆلی رەخنە و هەموو لایەك تێگەیشتوون ئەوەی ئەوان بۆ ئاشوب و ئاژاوە دەیكەن، لە دەرەوەی پێوەرە ئەخلاقیەكانە، ئەوەتا جێگری سەرۆك وەزیران ئامۆژگاریان دەكات لەو رەفتارە دوور بكەونەوە و سەندیكای رۆژنامەنووسان پێیان دەڵێت ئەو خوار و خێچیە پەیوەندی بە ئەخلاقی رۆژنامەنووسیەوە نیە و میترۆ ئاگاداریان دەكاتەوە كە ئەوە رەفتاری رۆژنامەوانی نیە و وەزارەتی رۆشنبیریش پێیان رادەگەیەنێت: كە ئەوەی ئێوە دەیكەن بازدانە بەسەر یاسا و رێسا كارپێكراوەكان.

PUKMEDIA