كۆرمۆر... كاتێك تۆمه‌ت پێش ڕاستی ده‌كه‌وێت

PUKMEDIA

سۆران داودی

سۆران داوودی

پارتی دیموكراتی كوردستان‌ هه‌ڵمه‌تێكی ڕاگه‌یاندنی به‌رچاوی سه‌باره‌ت به‌ ڕووداوی بۆمبارانكردنی كێڵگه‌ی غازی كۆرمۆر ده‌ستی پێكرد.

 هه‌ڵمه‌تێك‌ گشت چوارچێوه‌ پیشه‌ییه‌كان و بنه‌ماكانی كاری ڕاگه‌یاندنی پێشێلكردووه‌ و سنووری ڕه‌وشت و به‌رپرسیارێتی تێپه‌ڕاندووه‌. 

هەڵمەتەکە بريتییە له‌ شه‌پۆلێك تۆمه‌تی ئاماده‌كراو و داڕشتنی سيناريۆی ساخته پێش ده‌ركه‌وتنی هه‌ر ڕاستییه‌ك یان ئه‌نجامێكی ره‌سمی.

له‌ یه‌كه‌م ساته‌وه‌ختی بۆمبارانه‌كه‌وه‌، ده‌زگاكانی ڕاگه‌یاندنی پارتی چاوه‌ڕێی ئه‌نجامی لێكۆڵینه‌وه‌ و پابه‌ندی شیكردنه‌وه‌ بابه‌تییه‌كان نه‌بوون. به‌ڵكو په‌رۆشی ئاراسته‌كردنی په‌نجه‌ی تۆمه‌ت بوون بۆ یه‌كێتی نیشتمانی كوردستان، به‌ هه‌ڵسوكه‌وتێك عه‌قلييه‌تی سیاسی مامه‌ڵه‌كردنی ئه‌و راگه‌ياندنه‌ی پارتی له‌گه‌ڵ هه‌موو ڕووداوه‌كان ئاشكرا ده‌كات وه‌ك ده‌رفه‌تێك بۆ هێرشكردن، ته‌نانه‌ت ئه‌گه‌ر له‌سه‌ر حیسابی ڕاستی و ئاسایشی هه‌رێم و هه‌یبه‌تی بێت.

ئه‌وه‌ی ڕوویدا و ڕووده‌دات ته‌نیا هه‌ڵه‌یه‌كی ڕاگه‌ياندن  نييه‌، به‌ڵكو به‌شێكه‌ له‌ هه‌ڵمه‌تێكی ڕێكخراو بۆ ڵێڵکردنی ئاوەکە و داڕشتنی گێڕانه‌وه‌ی سيناريۆيه‌كی سیاسی پێشوه‌ختە. گێڕانه‌وه‌یه‌ك به‌ نيازی ورووژاندنی خه‌ڵك بۆ قوڵکردنەوەی ناكۆكییه‌ حزبییه‌كان و خستنه‌ڕووی سیناریۆیه‌ك كه‌ په‌یوه‌ندی به‌ واقیعه‌وه‌ نه‌بوو، ئه‌وه‌ی جێي سه‌رسوڕمانه‌ ئه‌م گێڕانه‌وه‌یه‌ پێش ڕاگه‌یاندنی ئەنجامە ره‌سمی و ئه‌منییەکان ده‌هۆڵيان بۆ لێدا، وه‌ك  ئه‌وه‌ی بڵێيت تۆمه‌ته‌كه‌ ئاماده‌یه‌ و ئه‌نجامده‌ر پێشتر دیاریكراوه‌ و تەنیا ماوه‌ بانگه‌وازی بۆ بكه‌ن.

كێشه‌كه‌ ته‌نیا‌ وتاری ڕاگه‌یاندن نييه‌، به‌ڵكو لێدوانه‌ دژ به‌يه‌كه‌كاني ژماره‌یه‌ك له‌ سه‌ركرده‌كانی پارتیيه‌ كه‌ له‌گه‌ڵ ‌بانگەشەی ڕاگه‌یاندنه‌كانیان پێچه‌وانه‌يه‌ و يه‌كناگرێته‌وه‌. له‌ كاتێكدا كه‌ناڵه‌ حزبییه‌كانيان سيناريۆی تۆمه‌تباركردنی یه‌كلاكه‌ره‌وه‌ هه‌ڵده‌به‌ستن، هه‌ندێك له‌ سه‌ركرده‌كان گێڕانه‌وه‌ی جیاواز یان سووكتر پێشكه‌ش ده‌كه‌ن، ئه‌مه‌ش یه‌كنه‌گرتوویی وتاری سياسیيان ده‌رده‌خات و ده‌رگا بۆ پرسیاری جددی سه‌باره‌ت به‌ هۆكاره‌ و ئامانجه‌ ڕاسته‌قینه‌كانی هه‌ڵمه‌ته‌كه‌ ده‌كاته‌وه‌.

ئه‌مڕۆ دوای ئاشكرابوونی ڕاستیيه‌كانی ئه‌و كرده‌وه‌ تیرۆریستیيه‌، لاوازیی وتاری ئه‌و پلاتفۆرمانه‌ ده‌ركه‌وت كه‌  بانگه‌شه‌یان بۆده‌كرد . ناكۆكییه‌كان به‌ ڕوونی هاتنه‌ به‌رچاو، كه‌لێنی نێوان ئه‌وه‌ی ڕوویدا و ئه‌وه‌ی له‌ ڕاگه‌یاندنه‌وه‌ بانگه‌شه‌ی بۆ كرا، فراوانتر بووەوە.

ڕووداوه‌كان ڕوونیان كرده‌وه‌ وتاره‌ نەگەکانیان كه‌ بانگه‌شه‌يان بۆ كرد، ته‌نیا هه‌وڵێك بوو بۆ هه‌ڵهاتن له‌ به‌رپرسیارێتیی، یان بۆ ئاراسته‌كردنی ڕای گشتی به‌و شێوه‌یه‌ی خزمه‌ت به‌ ئه‌جێندا سیاسییه‌ ته‌سكه‌كانيان بكات.

قۆستنه‌وه‌ی ڕووداوێكی مه‌ترسیدار به‌ قه‌باره‌ی بۆمبارانكردنی دامه‌زراوه‌یه‌كی ئابووریی ستراتیژی، بۆ پاكتاوكردنی حساباتی حزبی، نه‌ك ته‌نیا داڕمانی ڕاگه‌یاندنه‌، به‌ڵكو مه‌ترسییه‌كی ڕاسته‌قینه‌يە لەسەر یه‌كێتی هه‌رێم و وێنه‌كه‌ی له‌به‌رده‌م ڕای گشتیدا. مامه‌ڵه‌كردن له‌گه‌ڵ پرسه‌ ئه‌منییه‌كاندا به‌ لۆژیكی بانگه‌شه‌، متمانه‌ی ڕاگه‌یاندن له‌ده‌ست ده‌دات و دامه‌زراوه‌كان لاواز ده‌كات. زه‌مینه‌یه‌كی له‌باریش بۆ پشێویی درووست ده‌كات.

ئه‌وه‌ی ئێستا پێویسته‌ توندكردنی هه‌ڵمه‌تی بانگه‌شه‌ نييه‌‌، به‌ڵكو وتارێكی به‌رپرسیارانه‌یه‌ كه‌ له‌گه‌ڵ مه‌ترسییه‌كانی قۆناغه‌كه‌دا بگونجێت و پشتیوانی له‌ ده‌زگا په‌یوه‌ندیداره‌كان بكات له‌ پێناو ئاشكراكردنی تاوانبارانی ڕاسته‌قینه‌دا. بابه‌ته‌كه‌ له‌ به‌كارهێنانی كارتێكی فشار  و كورتكردنه‌وه‌ی له‌ لێدوانه‌ به‌په‌له‌كان گه‌وره‌تر و قوڵتره‌.

 ڕاگه‌یاندن كاتێك ده‌گۆڕێت بۆ ئامرازێكی هاندان شه‌رعییه‌تی له‌ده‌ست ده‌دات و كاتێكيش له‌ ڕاستیيه‌كان دوور ده‌كه‌وێته‌وه‌، هه‌رچه‌نده‌ پلاتفۆرمه‌كانی فراوان بێت و توانای زۆر بێت، دەڕووخێت. ڕاستیش له‌ هه‌موو ژاوه‌ژاوه‌كان و گێڕانه‌وه‌ دروستكراوه‌كان به‌هێزتره‌.

PUKMEDIA